الحزن بير ... شعر شحاتة فكري
الحزن بير
وانت اللي محدوف جوا منه
مش قسمتك تفرح كتير
ومافيش عزيز ح يمد ايده وينجدك
ولا فيش فرح قادر يفصلك جناح
علشان تطير
الضلمه دايما موحشة
والخوف ما يعرفش الخشا
علشان كده مش راح يموت
ح تعيش أسير وتموت أسير
والسجن زنزانته السكوت
سلم بإن الدنيا دي مش راضيه بيك
وإن الفرح والانبساط والضحك دول في الدنيا محض مسميات
وإن اللي مات جواك نسي
وقت أما فات
يكتب لها معني ف قاموسك
إثبت على القضبان عشان القطر ما يجليش ف دوسك
غمض عيونك للوجع خليه يبوسك
وابقى انتشي بالآه وقولها بدون عدد
مش كل غيمة تظللك جايا بمدد
مش كل طيف للأمنيات راح يوهبك نفسين ونبض
الأرض مثواك الأخير
مترين في متر حـ يحضنك
طولا ف عرض
اهدي اللي فاضل برا منك منك
أخر ملامح نور فعينك لجل ما يشوف اللي جاي
اخر بصيص للضي
وحفظه كل الأغاني اللي أنت معرفتش تقولها
زي ما قالوها العيال
«يا طالع الشجرة»
هاتلي معاك عصفور
ياللي انت ع القمره
احدفلي حبة نور
يا حاجبني عن بكره
متعالليش السور
خليني أعرف انط
برا اللي معاجبنيش
خليني أعرف اكون
خليني اعرف أعيش
وادعيله وبزمه
يا رب هذا الكون
أنا فوت شيء مني
ع الأرض نفسي يكون
حظه ما يشبهنيش
حظه ما يشبهنيش
ساحة النقاش