بينسى ينط من زيفه .. شعر عبدالله صبري
بنحضن شهوة الفكرة
ونركب فوق كتاف النار
ونبني من عنادنا مزار
لورد الكبرياء والشوف
نصدق رقصنا الكحلي
ويجرحنا الأمان والخوف
وننسى إننا لحظة
في لقطة صغيرة في الفيلم
وان احنا يادوب خطوة
وأقصر م الحروب والسِّلم
أنا وانت اختزال خضَّة
يادوبك دبلتين فضَّة
في بحر المسألة المسكون
وجينا بفضل : كُن فيكون
ووسعنا الكلام خالص
فضيَّقنا علينا الكون
زهور الشعر تقطفها
أيدين النصح والإرشاد
وفعل الأمر في البِنْيَة
بيزعج مركب الإنشاد
فقول للي الغلط عمُّه
وحاول ينتقد فأشاد
هاقولك نكتة مش حلوة
أنا وانت يا خال هنموت
وهنسيبها بلاد وبيوت
وتلتين الحقيقة تابوت
وإحنا تِلت بيكابر
ويكدب والظروف واجعاه
ويلبس بدلة مش طايقاه
وينسى ينط من زيفه
ويتشعلق في كرم الله
ساحة النقاش