يا اللي انتِ رسماني ف خيالك ..شعر أشرف ناجي

يا اللي انتِ رسماني ف خيالك

شعر / أشرف ناجي 

صوتك دخان ......
بيسد سقف الحنجرة .. 
طالع رذاذ الوقت م الحلم الرخام 
باش الكلام .... 
ولا طعم باقي للغنا .. 
حتى الحروف المفعمة ..
لمت ديول الخيبة .. وانفجرت بكا
لما على الجرح اتكا ....
فرت عصافير الكناريا .. الساكنه روحي 
وفين تروحي ...
والملايكة مسلسلاكي ع الجحيم 
يا أفلاطون .......
إفتح لي كتب الفلسفة ... 
خليني اكمل سكتي .. للاوجود 
دق الجرس .. والحصة لسه ما انتهت 
مين اللي غير في التاريخ ..
وقلب موازين البشر ...
حتى اللغة .. من بعد نقش على الحجر 
بقيت عصية .. "وسيبويه " ... عمال يعيط
والقاموس منه اتسرق ... 
( ومنين اجيب ناس .. لمعناة الكلام يتلوه
إذا كنت أجي أقوله ... نص عقلي يتوه ) * 
ما تسبليش العيون ...
يا اللي انت ِ رسماني ف خيالك 
لا كنت يوم خيّالك ..... 
أنا مش أنا ... أنا من زمن تاني 
مريت على كل الخرايط غلط 
ودخلت حانة سكرت .. حد الإنتشا 
أنا قاري أخبارك في سِفر التثنية 
سرك فشا ....
يا كل عشاق الحقيقة المؤلمة .. 
حاسيب لكو العالم واهج ... 
لسه هامان .. بيشيد الصرح العظيم 
وقارون بيحصي في خزاين ثروته .. 
محتار وتايه في العدد .. 
واقف مجهز عدته ... جيش التتار .. 
واحنا يدوب .. لسه بننتظر المدد 
ناولينا كاس من خمرتك .. 
يمكن نفوق ..
يمكن نروق .. 
يمكن يبان الحلم في ضي النهار ..
جايز نصيغ عالم جديد ... مافيهوش دمار 
لما نعيد حسباتنا .. ونبطل هدد 
أو حتى تحصل معجزة ... 
من معجزات سيدنا المسيح .. 
وبهية تحبل بالولد ...... 
الكويت في 22/ 12 / 2014 
( * مقطع للشاعر عبد الرحمن الأبنودي من ديوان الموت على الإسفلت )