قهوة بطعم الوطن
_____________
على القهوة بتندب حظها الفناجين
بيتعايروا بمرارتهم..ومين داق مين
على القهوة الزمان واقف (بيضرب) ف الوطن(حجرين)
خليل سارح بمريلته اللي مابتنضفش
من العيد اللي فات جربان وماتشطفش
ورغم دا كله معلقته بتضحك لو تشوف الشاي
وكان زي الضياع ممسوس..وكان زي الحياة نسّاي
سيجارة ياصاحبي..خُد ..عفّر
ياحِزني..الفرح متشفر
طب اقلب..غيّر الوصلة
يا(دين)أمي دا (بيكفّر)
وأيوه دا كان على الناصية
وشفته لبنت بيصفّر
وأيوه البنت بضفيرة
وكل الشعب بيضفّر
بنقتل أحلى مافينا
تملّي نحس ف الآخر
(وننضف لما نتزفّر)
هنعمل إيه ..ف سااااعات البرود العام
ماتطلبش الوجع يرتاح ولا تقول :السعادة بكام
توكّل ع اللي خالقنا ودور ورا ساقية الحُكّام
هتلقى التبن متحمّل على كتاف اللي مش عايشين مابين قصة حلال وحرام
كُلوا واتهنوا من تبن اللي قانيكم..واطمنكم ..هتبقوا تمام
حمير يعني
لا سمح الله
دا كله كلام
هتلعب..خاف على ملِكك
أنا ؟؟ طاب كِش
هنبدأ كومي يااخوانّا..ها..مين هايخُش؟
وكانوا اتنين (نقول شُيّاب)
بيضربوا سيف ف كوتشينة أساسها الغش
بلدنا دي لعبة مجنونة..بنرمي ورقها زرْع سنين
وييجي (الواد) ف لحظة يقُش
في قهوتنا اللي شبه التوت..وشبه الموت..وشبه الناي
بنشرب دمّ أوطانّا بطعم الحيرة والحسرة
بنتحاسب على مشروب لعبنا كتير على سِمّه
وراهنّا
وفاز الحزن بالبصرة
غريبة..يامصر..حاضنانا ..ولكن للأسف دايما
بتبقى ضمّتِك كسرة
ساحة النقاش