الشاعر عمرو حسن

بلاش تتغش في التمثيل 
تقول على واحدة بنت حلال 
بلاش ببساطة تعمل deal 
عشان مخك ماهوش شغال 
بلاش بغباوة التسبيل 
تسيب نفسك لواحدة شمال 
ف هذا الوقت يازميلي 
ضروري تاخدها بالعِشرة 
ببلاش تتغر باللمعة 
عشان في كتير دهب قشرة 
ولو مشدود لضحكتها 
ولمستها 
وحاجة تانية حبيتها 
ياريت تتأنى ياخيبتها 
لانك لما هتاخدها وتكبر كل ده هيروح 
ياريت تحسبها بالمعدول وتختارها بجمال الروح 
تكون عاقلة وتشبه ليك 
بتصغرلك وتكبر بيك 
يكون شغلتها تملى عنيك 
وتبقى معاك ليوم الدين 
تكون "ستك" ف حواديتها 
تكون "امك" ف طيابتها 
وتبقى "اختك" ف سمعتها
وتبقى شقية برضه عشان 
تكون مجنون بشقاوتها 
وتبقي رقيقة وبسيطة 
وواثقة ف روحها وعبيطة 
وتبقي بنت ناس بُسطا 
ومش welcome و hi و sofag
وتبقى زينتها كرامتها 
بدون مكياج 
ومتواضعة ومغرورة ومتماسكة ومكسورة 
ولما تقوللها ايه الحال / تقولك عال ومستورة 
فيا زميلي ..
ماهيش لعبة الحكاية عشان 
تنقي واحدة مجهولة 
دي عشرة عمر صدقني 
ياريت تحسبها برجولة 
عشان الرحلة هتطوِّل
وممكن هي تتحوِّل
فـ خُد وقتك من الأول 
لإن الدايرة مقفولة