فضفضة .. شعر وفيق جودة

(فضفضة )

ماعُدتش قادر اتبدّل
ولا اتعدّل
ولا اشهق دمعتي بالبوح
مفيش غير الكلام بيسيل..بيتوضى على كُفره
فتتحرك للحظة الروح..
وترجع تاني لمكانها
كأنه مفيش رجا بيدُق باب ف الأصل كان مفتوح
ساعات بعتب على نفسي
وليه انا وحدي ماتغيرش
انا مش زي ناس غيري
بتتقدر ومتقدرش؟!!
لاشايل صولجان مُلكي
ولا ساند سمايا العرش
كتير بيقولوا إني غريب
وبتنفس عذاب مفضوح
ومش فاهم
ومتناقض
وبَتكبر على المسموح
أنا بالفعل شئ تاني
بواسي بعتمتي القناديل
وانا الشارع
وانا الشاعر مشي عمره مع المواويل
انا الكافر بدين العرف والعادات
انا الغافر لخرق الذات حدود الذات
انا الصوفي اللي متعكر من اللذات
انا اللي غزلت توب دمعي من الأمواج
وانا اللي اديت جنوني لبحر مش محتاج
وانا الموت اللي علمكم تخُشّوا ف الحياة أفواج
انا المجنون وانا العاقل
وانا الماشي إلى نفسي..وانا الحائل
وانا اللي بفلسف الضحكة..وافلّسها
وانا اللي بهبّط الدمعة واحمّسها
وانا الساخط وانا الساكت
وانا الثابت وانا السافل
انا اللي ماكنتش اتخيل
بإني ف لحظة مفروشة بألم وجموح
هودّع للإسف إنسان
مشي على عكس سكتكم
ودَق ف نعشه كام مسمار
على كام لوح
بيبني سفينته بجنونه..ويخلق للبشر طوفان
عشان ماقدرش يخلق نوح
https://www.facebook.com/agarridgeneration