صعيدي
_____
ما بين أرضه
ولمة ولده
كان عايش
ويحمد ربه ع البتاو
وع الفايش
صبور صبر الجمل ع المشي
عنيد عند الجبل للريح
صعيدي صحيح
مالوش في المكر والتلوين
ودغري صريح
مالوش في اللف والدوران
وطبعه شديد
و وجهه مليح
وأسمر لون تراب الأرض والغلة
ولا يقبلش بالذلة
وزي النيل
بيمشي في اتجاه واحد
ولا يخافش غير الواحد
ولا ينطقش غير الحق
وقلبه يساع جميع الخلق
وكان سباق
لفعل الخير
وزي الطير
بيصحى الفجر ويصلي
يقول رزقي هيوصلي
من الرزاق
وشايل منجله وفاسه
ورابط شال على راسه
يقول يا أرض هاوديني
كفاية عناد
زرعتك بالأمل والصبر
ورشيت المحبة سماد
ف ليه بتخبي محصولي
دا انا مربيكي يا سمرا على يدي
يا بت النيل ياعيقانة
دلالك زاد
وانا بالكاد بعشي الولد فضل كريم
صعيدي صميم
يخبي الحزن في قلبه
ويخفي الدمعة في عيونه
ولا يـبـيـنـش أوجاعه
ولو بالسيم
تشوفه تقول دا عمره ما حب
ويمكن حتى مالهوش قلب
لكنه رغم دا عاشق
وعشقه غشيم
في ضي النجمة كان يسهر
يبصلها ويتفكر
عيون شغلاه
ومستنظر تفوت تاني
وتبعت نظرة للمسكين
يشوف ف عينيها أرض براح
وطير بجناح
على خدود المليحة يطير
يروح فرحان لصياده
ولا يخافش لا موت ولا حبس
صعيدي وبس
طاحونة الدنيا دوارة
وهارساه هرس
وليه في الشدة قلب حديد
وليه في العشق قلب يحس
بياكل من شقا دراعه
وما يبيع اللي راح باعه
ولا بينكر لحد جميل
صعيدي أصيل
ومتربي
ومتعبي هموم وحنين
وصبره طويل
وقلبه حزين
على ناسه اللي نسيوهم
هناك ضايعين
يفتش وسط أحلامه
يشوف العمر قدامه
يعدي يفوت
وساعة الموت
يقول يا ربي تقبلني
مع التايبين
___________
#أغاريد الجيل الجديد #ضياء السواحلي
https://www.facebook.com/abosaadkw
ساحة النقاش