لساك هناك

لساك هناك
_________
رغم انحراف الصدق عن زيف الحقيقة
رغم احتلال الحزن للدنيا البريئة
رغم اقتناص الثانيه من جوف الدقيقة
لساك هناك 
بتعد ضى السيارات 
وتعد خطوات البشر
معكوسة نور الكشافات
تكشف دموعك فـ المطر
لساك لوحدك رغم كل الانحراف
رغم التناقض فـ الصور
قادر تكمل وبثبات 
رغم احتمالك للبشر
لساك هناك
حارس معاصر ع الوفاء
لو حتى كان رمزك حجر
قاعد لوحدك فـ الخلا
( حجرا يؤرقه الضجر)
لساك هناك
( لسه الأغاني ممكنة )
رغم إن كل الأمكنة رافضه الغنا
لساك مصمم تنشر الأوجاع نغم
وتعلم الريح اللي شاردة
ازاى تصفر للألم
يا أيها الحجر البجم
بطل تطاطي للحضارة اللي ارتوت من نزف دمك والتاريخ
اضرب وشوط فـ الكون وجع يعزف صريخ
واخلق بوادر حلم من نبض الهلاك
لساك هناك
رغم اللي شوفته من قلوب اتمردت
وتشكلت تعزف على وتر الحنين
لساك حزين
بتنادي ع الفجر اللي خاصم دنيتك
وبتشكي ليه من هجر قابل قسوتك ؟!
وأنت اللي كنت زمان .. مصاحب دمعتين
لساك هناك؟
مركب ورق ! ، 
والموج سلالم 
من غرق
لساك مآمن 
والمراكب كلها 
حلم ف عيونك بتحرق!
مادد إديك 
للوهم يمكن يلحقك
ونسيت تمد للهفتك
حبة عرق
لا شَيءَ يَسْكُنُ مُقْلَتَيكَ
سِوَى اعْتِرَافٌ بالأرَقْ
فامْدُدْ يَدَيكَ وَقُلْ سَلامٌ
وانْطَلِقْ
إن الحقيقةَ رحلةٌ
صَوبَ الشَّفَقْ
واياك تآمن للعدم
أحسن تقوم من غفوتك 
تلقى الحقيقة بتتسرق 
خليك هنا
إياك تكون مركب ورق!
لساك هناك
رغم ان كل الذكريات رافضه الرجوع
رغم احتدام اليأس ف لحظات الخشوع
رغم الألم .. رغم الدموع
لساك هناك
بتدق اوتاد الفرح وسط الطريق
لساك صديق الأمنيات
منتاش غريق بحر الهموم
ولا يوم تلوم الذكريات
صعب السكات لما بينطلق الأدان
اخلق من الضعف الامان
وامشي وشوف تلقي الألوف
مده الايدين مستنياك
نسى نفسك صوت الالم بشويش 
اجمع حروف الامل فى بداية 
صوت القلم اقوى من التشويش 
مهما انكسر للصبر غنواية 
لساك هناك قاعد تفكر 
بتشوط فى الكون و الغضب ماليك 
بتلعن جروحك و لا متخدر 
رافض طموحك و لا مغمض عنيك 
لساك هناك 
قاعد تمارس دور إله 
على الكون وتعمل مصطفى 
ع الطيبين 
يا أيها الحزن المزركش بالغناء
الأرض مش عايزة انبياء 
الأرض عايزة عاشقين
لساك هناك فـ قصتك
طالب حر جمر هـــواك
وعشق خطـــــــــــاك
و..رهن رضـــــــــــــاك
رغم القـــــــــــــــــــسا
وكـــــــــــــــتر الغبـــــــا
من اللى ساكن جعبتك
يبقى اكيـــــــــــــــــــــد
العيب ده اصلا غفلتـــك
لساك هناك 
تستنى نورى يشرقك
لحظة ميلاد 
تلم جزء الضلمة منك
تسبق تضمك
ورقك ف السما
يرسم هلال
راحل ف ساعات البعاد
و ف الوصول بدره عيون
تتحدى ف اللقا لون الحداد
لساك هناك
والكل قاعد ينتظر لحظة رجوعك
بتخبي نفسك فـ اللي راح وتنام بجوعك
لساك بيكسر مركبك موج الظروف
وتقول لكل الناس تمام وتعيش فـ خوف
يا أيها القمر اللي عاش خلف الخسوف
ما تمد ضيك للوجود يفرح معاك