أغاريد الجيل الجديد/ قناة نبض مصر "لساك هناك"
لساك هناك
رغم انحراف الصدق عن زيف الحقيقة
رغم احتلال الحزن للدنيا البريئة
رغم اقتناص الثانيه من جوف الدقيقة
لساك هناك
بتعد ضى السيارات
وتعد خطوات البشر
معكوسة نور الكشافات
تكشف دموعك فـ المطر
لساك لوحدك رغم كل الانحراف
رغم التناقض فـ الصور
قادر تكمل وبثبات
رغم احتمالك للبشر
لساك هناك
حارس معاصر ع الوفاء
لو حتى كان رمزك حجر
قاعد لوحدك فـ الخلا
( حجرا يؤرقه الضجر)
"أحمد الحج"
لساك هناك
( لسه الأغاني ممكنة )
رغم إن كل الأمكنة رافضه الغنا
لساك مصمم تنشر الأوجاع نغم
وتعلم الريح اللي شاردة
ازاى تصفر للألم
يا أيها الحجر البجم
بطل تطاطي للحضارة اللي ارتوت من نزف دمك والتاريخ
اضرب وشوط فـ الكون وجع يعزف صريخ
واخلق بوادر حلم من نبض الهلاك
لساك هناك
"شحاتة فكري"
لساك هناك
رغم اللي شوفته من قلوب اتمردت
وتشكلت تعزف على وتر الحنين
لساك حزين
بتنادي ع الفجر اللي خاصم دنيتك
وبتشكي ليه من هجر قابل قسوتك ؟!
وأنت اللي كنت زمان .. مصاحب دمعتين
لساك هناك
"شاهيناز فواز"
لساك هناك؟
مركب ورق ! ،
والموج سلالم
من غرق
لساك مآمن
والمراكب كلها
حلم ف عيونك بتحرق!
مادد إديك
للوهم يمكن يلحقك
ونسيت تمد للهفتك
حبة عرق
لا شَيءَ يَسْكُنُ مُقْلَتَيكَ
سِوَى اعْتِرَافٌ بالأرَقْ
فامْدُدْ يَدَيكَ وَقُلْ سَلامٌ
وانْطَلِقْ
إن الحقيقةَ رحلةٌ
صَوبَ الشَّفَقْ
واياك تآمن للعدم
أحسن تقوم من غفوتك
تلقى الحقيقة بتتسرق
خليك هنا
إياك تكون مركب ورق!
"أحمد البرعي"
لساك هناك
رغم ان كل الذكريات رافضه الرجوع
رغم احتدام اليأس ف لحظات الخشوع
رغم الألم .. رغم الدموع
لساك هناك
بتدق اوتاد الفرح وسط الطريق
لساك صديق الأمنيات
منتاش غريق بحر الهموم
ولا يوم تلوم الذكريات
صعب السكات لما بينطلق الأدان
اخلق من الضعف الامان
وامشي وشوف تلقي الألوف
مده الايدين مستنياك
لساك هناك
"حازم القاياتي"
نسى نفسك صوت الالم بشويش
اجمع حروف الامل فى بداية
صوت القلم اقوى من التشويش
مهما انكسر للصبر غنواية
لساك هناك قاعد تفكر
بتشوط فى الكون و الغضب ماليك
بتلعن جروحك و لا متخدر
رافض طموحك و لا مغمض عنيك
لساك هناك
"نبيل صبري"
لساك هناك
قاعد تمارس دور إله
على الكون وتعمل مصطفى
ع الطيبين
يا أيها الحزن المزركش بالغناء
الأرض مش عايزة انبياء
الأرض عايزة عاشقين
"نافع سلامة"
لساك هناك فـ قصتك
طالب حر جمر هـــواك
وعشق خطـــــــــــاك
و..رهن رضـــــــــــــاك
رغم القـــــــــــــــــــسا
وكـــــــــــــــتر الغبـــــــا
من اللى ساكن جعبتك
يبقى اكيـــــــــــــــــــــد
العيب ده اصلا غفلتـــك
"عماد ابوالعلا"
لساك هناك
تستنى نورى يشرقك
لحظة ميلاد
تلم جزء الضلمة منك
تسبق تضمك
ورقك ف السما
يرسم هلال
راحل ف ساعات البعاد
و ف الوصول بدره عيون
تتحدى ف اللقا لون الحداد
"إيناس البنا"
لساك هناك
والكل قاعد ينتظر لحظة رجوعك
بتخبي نفسك فـ اللي راح وتنام بجوعك
لساك بيكسر مركبك موج الظروف
وتقول لكل الناس تمام وتعيش فـ خوف
يا أيها القمر اللي عاش خلف الخسوف
ما تمد ضيك للوجود يفرح معاك
لساك هناك
"شحات فكري"
***********************
تتقدم صفحة أغاريد الجيل الجديد وقناة نبض مصر بخالص الشكر والتقدير إلى الشعراء الذين شاركوا في "أوبريت لساك هناك" مع تمنياتنا لهم بمزيد من التألق والعطاء والإبداع.
ساحة النقاش