مزنووووق ... شعر عبدالله صبري
مهداة إلي الشاعر الصديق / حسام حسين
*********************
أول خطاوي التقوي عشق الإنحراف
..
حب اقتراف الكشف حد الإحتراف
مطر اغتراب الحق / تعذيب الجفاف
مدك لرجلين الغنا علي أد كرهك للحاف
يلعن أبوه اللي اصطدم بالممسوخين – صفوًا – و خاف
يلعن أبو الفرَح المريب فوق جثة والعة لضحكة حاف
يلعن أبو الناس اللطاف المعزومين علي ضحكتك
يلعن أبو الناس اللطاف .
ماله الجدع دا بيفتخر بالمعصية ؟
و يحرض العادي المهمّش ع التظاهر و الخروج .
ماشي – ف أيديه الويسكي – بين الساجدين
يدلق كاسات العزف ع الحزن البدين
ماهو ناس بتسكر ... كتر دين
و ناس بتكسر ... خلف دين
و ناس بتخسر ... لجل دين
و ناس بتكسب ... شغل دين
( ولا هممت بشرب الماء من عطش
إلا رأيت خيالا منك في الكاسِ
ما لي و للناس كم يلحونني سفها
ديني لنفسي و دين الناس للناسِ ) ¹*
يشرب و يسخر م الصفوف
و يشد في دقون الظروف
بس الغريبة ان اللي واقفين في الأمام
بيلاقوا قلبه هناك إمام
و بيقرا – من غير أي خوف –
" كلا لئن لم ينته لنسفعا بالناصية " ²*
ماله الجدع دا بيرتقي شجر الإيمان بالمعصية؟ !!!
مزنوق كدة ف حبة حاجات :
جناحين و شارع خالي من نبح الكلاب .
وشين حديد يستحملوا خيانة الجزم .
كمامة تمنع تسريبات ريحة قلوب الآخرين
مرايات ما بتبينشي تقسيم المطاوي
مواعيد مناسبة للنزيف و شموس ما تقبلشي الرشاوي
ماله الجدع دا بيتزنق في حاجات غريبة و مربكة ؟!!!
ساحة النقاش