كريستوفر كولومبوس .. شعر عبدالله صبري

(كريستوفر كولومبوس )

مهداة إلي: أصدقائي ساكني الغابات و الجزر المنعزلة

================
ما يهمهوش الفرق بين الين و اليورو

و لا سهم أيه متصدر البورصة
...
بيهمه بس الفرق بين البورص و العقرب

و الرقص و القرصة

و عشان بيقبض م السما و الأرض و الأشجار

ما يجيش في باله يشيل معاه كرت ائتمان

و لا عمره خد قرض و هرب و لا باع و خان

رغم ان في بنوك ربنا ما بيسألوش : انت اسمك ايه ؟

زي النسيم الفوضوي بيعيشها من غير خط سير

و برغم انه ساعات بيرجع بالأرانب

عمر الصحافة ما قالت انه مليونير

و ان حد سأله عن ديانته

يقوله انا إنسان يا عم

بيخاف يسلم ع الحضارة احسن ايديه تتعاص بدم

و لانه واخد م الشموس و البحر إيصالات طبطبة

متغاظة منه كل شركات المياه و الكهربا

لا بياخدوا رأيه ف حرب و لا وقت السلام

و ما نالش م المدنية غير قرف الفضول

شكل الخدوش علي جسمه بينقط كلام

و عنيه جواب مليان عتاب

للدنيا و الريح و الفصول

آخر طريق بيودي لبلاد البشر

عصفور هرب م الطيارات

و جري استخبي في القمر

كل اللي كان في الروح و بالغصب انكسر

يا صاحبي يا طعم الأغاني المتعبة

اعزف لوحدك في البراح

و انفد بجلدك من وشوشنا المرعبة