نورك جي مني.. شعر شامل العزيزي

الشاعر شامل العزيزي والدكتورة عصمت الخربوطلي ضمن فعاليات صالون الخربوطلي والرفاعي.
نورك جي مني.. شعر شامل العزيزي
=======================
يللي نورك جي مني .. عيشي بعدي حلم مكسور الخيال .
كنت بحرك للتمني .. ودعيني واغرقي ف جرح المحال .
افردي ضلك .اسمعي ذلك . وزيدي بالعطش موال .
ارحلي ف نفسك.اسجدي ليأسك .. وابدأي من أول اللي اتقال .
... جوعي من كتر الشبع .. مدي عيونك وامسكي بيها الضياع .
كوني الجبان الي افتكر نفسه شجاع .
... تمتمي بالسحر على رمل الودع .انزلي على سلم الصبر الي طالع ع الوجع .
اغزلي اللغز الي تراكيب الزمن بتعقده .
ازاي يموت الضي ساعة مولده .. ازاي يعيش مؤمن مسلم بالبدع .
انتي قلبك نفسه يتهجى الحاجات .
لسه مشتاقه لفتات ..
افتراء الحق ميعبش الحقيقة .. واجتراء الكدب بيهد الثبات .
احتلام البدر بالنور في السما .. يبقى معناه انه قرب للممات .
وانتي نورك جي مني رغم زيفك بالجمال .
ودعيني واشربي المر الزلال .
ودعيني واغرقي ف جرح المحال .
عيشي بعدي حلم مكسور الخيال .
اجهري بالصمت ياما الصمت قال .
افردي ضلك .. اسمعي ذلك وزيدي بالعطش موال .ارحلي ف نفسك .. اسجدي ليأسك وابدأي .. من أول الي اتقال