نَزْف الشوارع...... شعر شحاتة فكري
نزْف الشوارع كل يوم جوه الحياة
مع صبح بيشد النهار من بين عيون الشقيانين
ويفوت على كتف الرصيف كل اللي فاضل من وجع
... ... أو كام حكاية من حكاوي المغرمين
والصبر كره الانتظار جوه الطابور
مخنوق من البطء اللي مخنوق من الروتين
وسنين بتخفي جرحها النازف ألم
وجروح بتكبر كل يوم جوه السنين
وحلم ماشي عكس سير الاتجاه
عازف مواجع وحدته علي ناي حزين
والنيل بيهرب جو همه من التعب
ويجف لما يشوف عيون العطشانين
وبصيص أمل واقف هناك عمال يشاور
والناس بتسأل نفسها شاور لمين
ساحة النقاش