اجراءات استخراج صورة رسمية لمستند في دعوى متداولة
==================================
اهم حاجة متنساش تصبح على السكرتير =D
الاول بنكتب طلب بنوضح فيه اسم مقدمه وصفته وترفق فيه صورة التوكيل عليها صورة الكارنيه بتاعك بتروح للجدول او السكرتير على حسب الاحوال وتاخد معلومات على الطلب ومتنساش تصبح على السكرتير =D طيب يعني ايه معلومات عبارة عن رقم الدعوى وبيان اخر جلسة فيها ونوعها وبيوقع عليها الموظف لازم نفرق بين استخراج الصور الرسمية في المدني والاسرة وبين الجنائي لاننا في الجنائي بعد ما بناخد معلومات من الموظف لابد من عرض الطلب على النيابة للتأشير عليه وبعد كده بتروح لرئيس القلم لتقدير رسم على الطلب طبعا بيختلف الرسوم على حسب نوع الاوراق سواء كان حكم او محضر جلسة او غير ذلك ، ومتنساش تصبح على السكرتير =Dبتروح الخزينة وبتدفع الرسوم بتاخد ايصالين واحد احمر بتحتفظ بيه واحد ازرق بترفقه في الطلب ونصيحة لو ليك باقي اقل من 5 جنيه اوعى تسال عليه 😂 بعد ما دفعت الرسم بترجع للسكرتير بكده تكون وصلت لاهم حاجة وهي انك متنساش تصبح على السكرتير =D بعد كده هيطلع ملف الدعوى ويسلمك المستند المطلوب وهنا بالذات اوعى تنسى تصبح على السكرتير هتاخد المستند وتروح تصوره وتروح على حاجة اسمها قلم الصور وده موظف معاه دفتر بيقيد فيه اي بيانات المستند المطلوب الحصور على صورة منه وبيانات الطالب وصفته وهتوقع في الدفتر وترجع تاني للسكرتير عشان ياخد اصل المستند منك واوعى تنسى تصبح على السكرتير =D واخر خطوة هترجع لرئيس القلم عشان يختم المستند بختم النسر بكده انت خلصت
بس اهم نصيحة اقدر اقولها لك اوعى تنسى تصبح على السكرتير
=D
