10طرق للخسارةالمضمون في الاسواق المالي(ناديالـ90%)

منذ قديم الازل و النسب الكبيرة غالبا ما تجذب اليها الناس و لذلك تجد الطلبة يتقاتلون لكي يحصلوا علي نسب درجات مرتفعة اعلي من 90% ,و لكن الحقيقة ليس دائما ما تكون النسب الكبيرة هي الجيدة خاصة عندما يتعلق الامر بالاستثمار و الاسواق المالية,فنسبة الـ90% هنا تشير الي الـ90% من المشاركين في الاسواق المالية الذين غالبا ما ينتهي بهم المطاف بخسارة كل اموالهمو لذلك اطلق عليه نادي الـ90% ,و هنا نلقي الضوء علي ما يفعلونة و كذلك نقدم النصح لباقي الافراد لكي يلتحقوا بذلك النادي سهل العضوية !!!.

لو انت مش عارف الاتجاة ادخل السوق

ايه اللي ممكن يحصل؟ ولا حاجة ها تخسر كل فلوسك و ده المطلوب !!.

 اجعل عواطفك تتحكم بك

هو ده المفتاح الحقيقي للخسارة, فدخول السوق بناء علي العواطف و بناء علي الامل ان السعر سوف يتحرك في الاتجاه اللي انت نفسك فيه سوف يجعلك عبد لمشاعرك و مشوش الرؤية, وبذلك تخسر كل فلوسك.

لاتضع اوامر وقف الخسارة Stop loss

امر وقف الخسارة هو اللي بيحميك من الخسارة الكبيرة و انت هدفك انك تخسر كل فلوسك يبقي احنا ها نحطه ليه؟

 ادخل السوق بنسبة كبيرة من راسمالك

لو انت مستثمر 100,000 جنية مثلا في السوق, المفروض انك تدخل بنسبة 10% كحد اقصي من اجمالي المبلغ المستثمر اي بـ 10,000 و لكن هذا سوف يجعلك تقلل خسائرك و انت تريد ان تزيد منها, و لذلك يجب عليك الا تتقيد بتلك النسبة و ان تتاجر بنسب كبيرة ربما 90% او 100% .

كل 3 ايام طبق استراتيجية جديدة

طبعا لما هاتطبق الاستراتيجية الجديدة هاتطبقها غلط لانك مازلت مبتدئ ولا تتقن كل مفرداتها و خبياها و لذلك سوف تتركها و تذهب لتجرب استراتيجية اخري علي امل ان تحقق ربح اعلي و هكذا تحص علي عضوية نادي الـ90%.

امشي مع الناس

اي حد يقول اي كلمة او توصية طبقها علي طووول من غير تفكير و كمان المفروض انك تثق في كل الناس ولا تثق في نفسك اطلاقا هو انت يعني ها تفهم اكتر منهم؟

 اجعل الشارت مليان مؤشرات

بحيث ما تعرفش تشوف السعر ولا تقدر تحدد حركته لان كل مؤشر له طبيعتة الخاصة و استخدامة الخاص و ايضا كل مؤشر يدل علي اتجاه مختلف عن المؤشر الاخر و هكذا تكون قد اعتمدت علي المؤشرات الثانوية و تركت الاساس وهو حركة السعر و اتجاهه. 

ادخل السوق عشان تعمل ملايين

اعضاء نادي الـ90% المميزين هم اللي بيدخلوا الاسواق المالية بهدف الربح السريع و ازاي انهم يعملوا ملايين الجنيهات من ربع جنية , و كمان طوال فترة عضويتهم في النادي تكون صورة الفلوس الكتيرة اوي في خيالهم و كذلك السيارات الفارهة و القصور الفخمة و .... و ....

خليك فهلوي

السوق ده مش بتاع علم ولا تحلايلات و لكن السوق ده هو سوق الفهلوه و الهمبكة و ازاي تجيب الاخبار المستخبية – ويا بخت من كان خاله رئيس شركة كذا – و الشاب الجامد هو اللي يعرف الاشاعات و الاخبار و اللي بيفهم كل حاجة و يعرف يجيبها و هي طايرة و الحنجل والمنجل و....

 اصبر على الخسارة و استعجل المكسب

الوصفة السحرية هي انك لما تشوف الخسارة تقول لنفسك ان السعر ها يغير اتجاهه و تقعد تستني الفرج و طبعا كل شوية الخساره ها تزيد وانت طبعا مش ها تفرق معاك الحاجات دي, و تقعد تستني السوق لغايه ما تزهق و تقفل علي خسارة و تدعم عضويتك في نادي الـ90%.

بالتاكيد اذا تم تنفيذ كل ماسبق في و قت واحد سوف اضمن لك خسارة اموالك بسرعة جدا و كذلك سوف  تكون عضو في نادي الـ90% و قد تترقي و تكون رئيسه, و لكن اذا نفذت عكس ذلك فسوف تكون عضو في نادي الـ 10% .

 انت الان امامك عضوية الناديين ... فانظر ايهما تختار ؟ .