هى وصياد البلطية
صياد والرزق مالي المية
إصطدت فى يوم انا بلطية
بلطية عفية إنما هى
فشر الميّاسة البحرية
إحترت انا أعمل إيه فيها
أقليها أنا ولا أشويها
ياسلام ع السمكة المشوية
ياسلام لو كانت مخلية
مع نص لمونة تحليها
وشوية سلطة مع الفلفل
وكمان طبيقين رز مفلفل
شمر فى كمامك وإديها
وفى غمضة عين نطت قطة
ع السمكة انما حتة نطة
وخطفت مني السمكاية
من بعد مارسمت فى الخطة
وبقيت غنيوة انا وحكاية
يحكوها سهارى فى سهراية
كل ماعدّي انا جنبيهم
يضحكوا ويعلوا الضحكاية
ويغنوا الغنوة المشهورة
من بعد مابان فى البنورة
صياد البحر المتعافي
قال وشم الهلب على كتافي
مبخافش من الحوت والقرش
وأخاف من قطة صغيورة
كده برضوا ياقطة ياحرامية
خليتي الناس بالملاغية
يلاغوني بلغوة ماهيش هى
تسيبيلي الرز مع السلطة
وتأزأزي إنتي البلطية
بقلم طارق السيد