مصر
مصر إللي إسمها ست بهية
فيها الطيبة فيها الحنية
فيها حاجات كده حلوة كتير
يتقال فيها أجمل أغنية
فيها الواقع والأساطير
وسندبادها إبن الجنيّة
فيها ترابها في جوفه الخير
فيها طراوة ساعة العصرية
فيها المصلاي الطيب جدا
فيها الديك في الفجر بيدّن
فيها الصبح الفول وبليلة
فيها الفرحان قال ياحليلة
فيها ريحة قرص الطعمية
فيها الشهقة على الملوخية
وإبن الحتة وبنت الحارة
وصحن طبيخ للجار والجارة
وبعد الصحن مالف ودار
وفضي وإتملا م الجارة والجار
ينسوا الصحن دا ملك لمين
آهو صحن ودار زي الدايرين
فيها وفيها إللي مخلّيها
فيها الميزة إللي تعلّيها
فيها الحب بكل بساطة
وكوز درة مشوي و زر بطاطا
فيها جمال الليل ع النيل
وشراع من نسمة هوا بيميل
فيها كمان براد الشاي
ويّا الناي وغنا المواويل
هى دي مصر الغالية آمان
بدليل مذكور في القرآن
تعيشي يامصر ياأم الدنيا
تملّي عظيمة عبر الأزمان
بقلم طارق السيد