باطي والنجم
أنا فقري تملي وباطي للنجم
أنا كحيان أفندي في حارة نجم
راضي قوي جدا بالمقسوم
وأدعي يارب النعمة تدوم
وأهي بتتقضى بريال فضة
ولما تزهزه يبقى جنيه
أكلها بدُقة ماأدنيش نفسي
علشان جوة في نفسي أنا بيه
لا أنا يوم قلت فيه حاجة في نفسي
ولا يوم قلت نصيبي كده ليه
لا أنا إبن أمير السندستان
ولا أبويا في يوم كان م الأعيان
ولا أنا سي سيمون إبن البوليفار
ولا عايز أتعشى في يوم كفيار
وأنا كده مالي عاجبني أنا حالي
معنديش ملك أشغل بيه بالي
أسعى لرزقي أنا في الصبحية
أزق في يومي يخربش فيا
وبعد شوية يحن عليا
بقى فيه أجمل من كده حال
بفرح قوي لما أبقى في عسر
علشان طعم حلاوة اليسر
طعم لايمكن يوم تضاهيه
سحر العيشة في أفخم قصر
ياللي سامعني إياك تتنكد
لما يضيق بيك يوم الحال
أنا نفسي يانِكدي إنك تتأكد
إن السعد ماهوش في المال
السعد بوعد من المتعال
لما هترضى هيرضى عليك
تلقى السعد جالك في الحال
بقلم طارق السيد