البستاني
مجني عليا وانا البستاني
زرعت حصد بستاني الجاني
مص في دمي وهد كياني
داس في كرامتي وشد وداني
وجري وسبقني وراح وشكاني
ليه وليه أنا قلت وداني وجعاني
حكموا عليا أعود من تاني
أطاطي في راسي أخدم في الجاني
أنا مجني عليا ليه أخدم جاني
قالوا راحة باله تبدأ بهواني
نمت ودمع الذل في عيني
أحلم يوم الجاني مايجيني
وفي يوم معلوم قمت من النوم
على ثوره وفيها مليون مظلوم
اللي بتمسك أيده رغيف
واللي في خيمة في طرف رصيف
واللي حالف مايعود للضلمة
واللي ماصدق ينطق كلمة
وناس في العز معانا في حروبنا
قلعت توبها ولبست توبنا
نزلت يزاحم كتفي كتافهم
أهتف صوتي يدوب في هتافهم
ونزلم خير جنود الأرض
يوفوا الوعد يصونوا العرض
حطوا صدورهم فدا لضهورنا
قاموا بدورهم قمنا بدورنا
كسرنا الخوف وركبنا الطوف
لاقينا النور على مرمى الشوف
علمنا شعوب مظلومة زيينا
في وسط البحر إزاي عدينا
اللي بناها أصلا حلواني
بناها زمان يبنيها من تاني
بقلم طارق السيد