بداية ونهاية
أنا ببكي دم مش دموع
من الوجع جوة الضلوع
وإللي شفته لما عشته
في المداين والنجوع
إللي جاره عنده تخمة
وهو مهري قرص جوع
واللي عنده ثروة ضخمة
والفئات من كل نوع
دولار و ين غير الدراخمة
والعشا على ضوء شموع
وإللي عاش اليوم بيومه
يوم فيه أكل ويوم يصومه
ولما الدنيا بتيجي عليه
بالسكسونيا يبيع في هدومه
والنعال فوق الرقاب
والخدود سفّة التراب
وواحة خضرا بنبع مية
مابتظهرش إلا في سراب
أما حقّة ناس جبابرة
أما أنتو فعلا ناس مكابرة
هييجي يوم وتبقوا عبرة
لأي وغد هبرله هبرة
والنهاية من البداية ليكو واضحة
والشهود عليكو منكو ليكو فاضحة
والموت إللي إنتو بتهربو منه
جاي مقابلكو
شاوروا عقولكو قبل سؤالكو
وقبل ماتلقوا كتاب في شمالكو
بقلم طارق السيد