مش محال
خدها منى لو بصير
اى قلب يحب ربه
يبقى صور
للمعاصى
واللى سارح فى الهوى
من غير غفير
واللى فاتح جوا صدره
خرم غفلة
موصله لنار السعير
يفتى مرة
وهو خاو م العلوم
ينفخ ف ودن ملانة سحر
وجب يوسف
والنفير
واللى عاشق نفسه حتى
مخلياه يعبد ف ذاته
بدون شعور
واللى قاتل ولد عمه
وابن أمه
وابنه اللى ساكن فى الرحم
ملهوش نذير
واللى حرف كل معنى قالها ربه
بال فى عبه
وانتصب وقت النخاسة
ف الثغور
واللى بايش وسط فهمه
كلمة صح
لما كح
خرج الجن وقبيلته
م الصدور
خدها منى
وطف نار الغدر وامسح
نقطة غارقة ف بير تهامة
والنشامة ف حضن داعش
سرسبت وحدة بلدها
واللى خدها رغيف ممزق
وارتمى بين الهوامش
البحر هاج والدنيا هاصت
والادين الناشفة غاصت
ف الدماء
والأسد بعد السيادة
لقيته ماء
خدها منى ونام ف بيتك
أو ف غيطتك
جوا منك
عدى ظنك
ارسم ف لوحتك ألف موسى
وعمرو تانى
اختم روايتك بالمعانى
والدليل
ودموع بتنسف كل سقف
يكون عميل
لون وخطط
اعرف وزبط
اللى باع واللى اشترى
واللى افترى
واللى زور واللى تحت
حزامه بضرب ف الحياة
واللى هرب قوت ولاده
ع الحدود
واللى خطط بيع بلاده بالنقود
واللى شرحه زى طرحه
ف العهود
واللى بنسف بكرة فينا
واللى بخذل كل صبح
بفوت علينا
واللى غمى ف وقت غفلة
نور عنينا
خدها منى
إنى منك
وانت ننى
خلى لوحتك
كاشفة ليك كل الظلال
ألوانها فاتحة
مش محال
مش محال
