خالديات....
طل الخريف ومال ميّولي
يفلش للشتي من وراق سجّادي√ة
ينشح نِدي وطرقات مبلولي
والغيم فوق الجرد والوادي
يغطّي السهل بِ شرشف رمادي
بلون السما وبردات ايلولي
......... ......... .............
والطير هاجر طار صوب شمال
وسكون رابض فوق ع التلّة
وناطور يترك للكرم عرزال
ملوّحة عناقيد تحِنْ للسَلّة
وصدى يلملم ميجانا وموّال
وزنود سمرا تحوّش الغلّة
.......... ........... ..............
ينبوع شحِّتْ دمعتو مشتاق
ينطر صبايا حاملي جرارا
وعجقة حكايا ودردشة عشّاق
هونيك حد النبع تفضح سْرارا
........... ........... .............
وفصول تمحي دعسة الايام
ولمحة بشر كانت مارقة
تروح وما ترجع تاخذ الاحلام
وتبقى بهالدني خبارا عالقة
ناس بتجي وبتفل
حكاياتها بِتْضَلْ
سنين العمر اوهام
......... ......... ...........
