بقرة ستِى
*********
على راس الغيط بقرة ستِى
تحلب فى الساقيه المشتاقه
لشفايف الأرض
وبتحدف ضحكه لعصفوره
بتعاكس فى النسمه النايمه
على خد الورد
والورد يِفتّح قناديله
ينده ع الشمس تغنيله
والغنوه فى الضله السمره
والضله فى رموش البقره
والبقره ماشيه بتتغندر
ف عبايه من سوق البندر
وف ديلها سنابل وغناوى
والاسمر ابو كحله تقاوى
شوفوا ستِى ..
بِتصَحِى نهارها
وبتغسل ع العتبه مسارها
وصفصافه ف السكه تضلل
جدايلها بالفرح تهلل
يامحنِّى ديل العصفوره
دا بلدنا حلوه ومنصوره