قصيده من ديوانى فى العاميه
بعنوان ((ودنك منين؟))
بقلمى ..محمد مغاورى
..................................
ودنك منين 
ياللى انت رايح تشترى 
داء السنين؟
ياوهم عايش بالأنين
سايب ترابك والزمن
وانت المدلل مؤتمن
مهزوم بفكرك 
والتمن 
إنك عواله 
وصرت عاله 
وكل حاله بتشبهك
للمدمنين
فالبس قناعك ........واختفى 
بين السنين
وافرد دراعك .......حبتين
يمكن تلاقى فى غربتك
حبة أمانى مبعترين
دا أنت الحنين فيك اتقتل
وانت المثل
للطماعين والسمّاعين
للعيبه لمّا بتنجلى..فوق الحقيقه 
بتعتلى
وانت الولى 
وانت اللعين
وانت اللى راجع للبداية 
بخطوتك
وانت اللى سابق للجهاله 
بمشيتك
فين همتك 
يامستكين
يامستعين بالرقص ويا الحنجله
هو الغلا
أصبح بضاعه مبرجله ومدهوله
واللذه طين؟
فين الأكابر لمّا كابر فى الأصاله 
المدمنين؟
فين اللى زلزل فى الحضاره الجهل لمّا
بيعتلى ركب السنين؟
راسم مصيرك فى الهوا
ناقش كتابك فهلوه
والا انت رقعه فى تابوت الميتين؟
.........................................
إن كان ترابك والزمن
هما الحصيله .......فانتبه
لسّاك مدوّن فى كتاب الموجودين
وان كنت ناوى تبتدى
فاخلع قناعك وارتدى
حلم السنين
...................................