نجم العام والمركز الاول اعتماد اسماعيل خورشيد السودان عن قصيدة ردي على رد الرسالة

ردي على رد الرسالة
كنت كاتب ليك اصالحك ... ليه تقول كاتب خبارك
جيت اعيش لحظات حنانك .... جيت احلق في ديارك
وانت لو فكرت لحظة .... اني ابعد عن مدارك
ابقي خليك في اكيده اني بشتاق لي مسارك
واني في يوم من حياتي جيت وما كان باختيارك
ومهما تغلط في مشاعري ما ببخس اعتذارك
كيف تقول كاتب خبارك
''''''''''''''''''''''
الرسالة الفيها ردك وفيها كلماتك اليمة
كيف تقول الريدة عدت واصبحت ما ليها قيمة
وكيف تدمر ذكرياتنا ويرضي قلبك بالهزيمة
حقو كان قبال كلامك تفتكر احلامنا والقصة القديمة
وتقبل العذر الكتبتو ترجع الريده ونعيمه
وما تقول كاتب خبارك
'''''''''''''''''''''''
وما تقول الرجعة لالا
كوني ابعد او اسيبك الف مليون استحالة
ولوغلطت عليك مرة ولو حرمت العين جمالا
وانت لو فكرت لحظة تنتهي الريدة بي مقالة
تاني بكتب ليك اصالحك وليك بكرر في الرسالة
ليَ ارجع يا عيوني واسعد العين بي وصالا
ما تقول كاتب خبارك
'''''''''''''''''
والكلام الفي جوابي ياها كلماتي الزمان
نابعه من قلبي ومشاعري وليك تنبض بالحنان
عايز اصالحك يا حبيبي وجيت اعيش بيك الامان
كنت قايل اني لسه لي في قلبك مكان
وكيف تقول لي قلبي انسى يهجر الحب اللي كان
وكيف تصرح انو ريدنا بينا كان ذلة وهوان
وكيف تقول الرجعة لا لا
'''''''''''''''''''''''''
عايزة اكتب ليك مشاعري
واني في يوم ماخدعتك واني حبيتك عشقتك
وباقي في وعدي الوعدتك
وكيف تفكر لحظة تنسى او تفكر اني بعتك
ولو صحيح كان لي مكانه كيف تصدق اني سبتك
حقو كان تفهم رسالتي تشهد ايامي العرفتك
وقبل ما تقول لي انسى
حقو انت تقدر الريده القديمة انو كان بيناتنا قصة
وانو لو الريدة صادقة ما اظن تنهيها همسة
ولو رجعت بذكرياتك وفي عيوني تهيم وترسى
كنت تعرف غير اقول لك انو ريدك باقي لسه
وما بتقول كاتب خبارك
'''''''''''''''''''''''''''
ويوم كتبت رسالتي ليك كنت صادق في اعتذاري
كنت حافظ لي عهودي وكنت لي احلامي شاري
جيت اصالحك واعترف لك انو ما كان باختياري
اجرحك اخدع عواطفك او ازيف ليك مشاعري
كنت عشمان في ودادك والقرار ما كان قراري
وحقو كان تسأل مشاعرك عن عواطفي وانتظاري
وما تقول كاتب خباري
'''''''''''''''''''''''
ولسه عشمان ترضي عني ولي ترجع يا منايا
وحقو كان قلبك يقدر حبي ليك واني عايش في وفايا
وانه ما بارادتي اجفى والعذاب الفات كفايا
ولو صحيح حبك حقيقة قدر الشوق الملك روحي وحنايا
واقبل العذر الكتبتو وصدق الحب في غناي
واني ما بعتك وخنتك واني ما نسيت الحكاية
كل ذنبي الما غفرتو اني صدقت الوشاية
ياني باقي على ودادي وانت اخترت النهاية
''''''''''''''''''''''''
وبرضو عايش في مدارك
ولسه عاشق لي جمالك
والمحبة البينا باقية لا بايدي ولا اختيارك
كيف تقول كاتب خبارك
ولسه راجيك بي مشاعري ليا ترجع بالسلامة
والقصيدة الجاتني منك انكرت عينيك كلامه
وابقي فاكر انو عيني شايفه فيك ريده ومرامه
وكيف تفكر تنسى ريدنا وكيف تسيب روحك غرامه
وليه تطاوع نزعة فيك بكره ياما تحس ندامه
وتعرف انو الدنيا بيك وفيني تعرف نور ضلامه
وانو يا دنياي مشاعري اقوى من كلمة ملامه
واطرى في آخر كلامي ريدنا اسما من الكرامة