قصيدة الأديب الجزماتى
==============
انا الأديب الجزماتى والجزمة رزقى فى حياتى
جلد طبيعى وموريتانى سكاى صناعى ولبانى
فى أيدى يبقى من تانى شنطة وجزمة لمدامى
تصليح بفتلة او مسمار تلميع ألمع باستمرار
والراديو يعنى ده مزاجى أغانى اسمع ده يوماتى
محطة واحدة وعاجبانى لسومة باسمعها ليلاتي
بشعر عامى وقصايد وموسيقى راقية مش زايط
فى الورشة دايما تسعدني وصوتها برضه بيطربنى
وحليم وبرضه عبد الوهاب وفريد وشادية ويا نجاة
اغانى حلوة وجميلة اسمعها واخد تعسيلة
جزم حريمى ورجالى تبوظ وترجع من تانى
والكعب برضه له معانى عالى وواطى فى مكانى
فى جزمة تعكس شخصية بصورة جامدة وقوية
لو جزمة يعنى ورجالى وجلدها غالى وعالى
تقول صاحبها من الأعيان والعز ماشى فى رجله كمان
ولو واحدة دايبة وفيها فتحات والفقر فيها عامل زيادات
تقول صاحبها فقير وكبير ولا عنده حتى دفتر توفير
ولو كعب عالى بجلد غزال والنعل يعنى جمال ودلال
صاحبتها تلبس كده خلخال وفى كل خطوة تهد جبال
ولابسة طرحة مع فستان جمال طبيعى يثير فى خيال
ولو نعل شبشب كده بصباع والوش دايب كده فى ضياع
ده يعنى صاحبه بلا أضلاع ولا عنده حاجة ولا أفراح
الخطوة رسمة ومقلوبة ومعانيها واضحة ومكتوبة
انا الأديب الجزماتى والجزمة رزقى فى حياتى
والفن حبى وهواياتى وسومة باسمعها يوماتى
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيو
