#أنانية
*أنا أصلاً أناني جداً و بعترف..مش هسيبك يوم تنامي معيطة..فاكرة لما قلتي إني جتلك مرة في المنام..أفرضي جيت فالمرة دي دموعك هتغرق حلمك مش هتكوني مركزة..و أنا أصلاً أناني مجيش و تكوني متشتتة..مش هسيبك تسرحي بيكي لخنقة..تخافي يوم و تترددي..تتنهدي و تشرد عنيكي..و تخبي قلقك ورا قلبك و من عيني تهربي و تقولي أنا كويسة..أنا هكون بينك و بينك..أنا أصلاً أناني مش هسمح ليكي تخوفك..مش هسيبها تهددك..عنداً فيها هطمنك..مش هعدي فمرة غير لما أضحكك..أو أشوفك بتضحكي..أنا أصلاً أناني..و تهمني فرحتي..و فرحتي طلعت فضحكتك..مش هعدي فيوم مناسبة تهمك بنسبة قليلة أو حتى تخصك أنتي نفسك..أنا أصلاً أناني و قررت اللي يخصك يخصني..و اللي فيوم بيخصني بعزه فوق الخيال و بيه علني بحتفل و في الخفى بشيله ف أوضة جوه قلبي أقفل عليها و لا أسمح لحاجة تحتلها أو تنقص من قدرها..عايز أشوفك بين صحابك و بين الناس بتونكشي زيك ساعة النهار لما كنا هناك ساعتها..عايز أشوفك ف وقت هدوئك و عزلتك زيك لما كنتي يوميها سرحانة بتدندني..عايز أشوفك بتتنططي زي م أنتِ..صغيرة..و عايز أشوفك فيكي حكمة زي م أنتِ بالواقع متأثرة..و عايز أشوفك مرة عنيدة و مرة مطيعة و مرة تانية مترددة زي م يدق اللي جواكي..و صوته مسمّع فقلبي متأكد من دقته..و لأني أصلاً أناني عايز أشوفك زي م أنت من غير حاجة متغيرة..شايف فيكي بداية طريق و رحلة كان نفسي أعيشها و حاجة معرفتش أرتبلها لأنها فوق الخيال..و لأني أصلاً أناني نفسي تكوني شريكة حياة و تشاركيني أنايا! م أنا أصلاً أناني و أكتشفت من يوم ماشوفتك أن هيبة الأنا ضاعت في حرم أناكي..و بما أنك السبب هفكر فيكي أنتِ..
مهو أنا أصلاً..بحبك!
#تقى_شهير
نشرت فى 12 ديسمبر 2015
بواسطة qwertyuioasdfgh
أخبار الشعراء والادباء العرب
جريدة لنشر كل اخبار الشعراء والادباء واجمل ما كتبت اقلامهم رئيس مجلس الادارة ورئيس التحرير الشاعر / خالد بدوى »
ابحث
تسجيل الدخول
عدد زيارات الموقع
89,145