-------------------------------------
الدنيا ماتنصــــــف عدل بين البشرْ
منهم الحظّّّة غنا ومنهم الحظة فقرْ
منهم التلكــــــــاهم بخـــير وســعيد
ومنهم التلكــــــــــــاهم بهم وقـــهرْ
د
ناس فــــــــوك الريح متهنية بدلال
وناس بالضيم وصفر تحت الصفرْ
ناس ماتدري الرزق من وين جاي
وناس كل عيشــــتها تعتير وعسرْ
ناس مرتاحة ولاتدري بمعــــاش
وناس حتى تعيش تنحت بالصخرْ
ناس تكضيها بملــــذات وطرب
على ميز قمار لوشــــــرب الخمرْ
والي حتى بلا عشة يمسي ويبات
يحــــلم بخبزة ولو حفنــــــــة تمرْ
بالـــولايايم مايدنـــــــــون الـــفقير
ولوكعد خلـــــــوا بماعونه كِـــسرْ
وبتملـــق ينعزم صـــــاحب المال
وعلى ماعـــونة يكثــــرون الهِبرْ
بيها من يحصد ملاييـــــن ابلاش
تشــــــــوفها الخيرات تنزلّه مطرْ
بلايه مايتعب ولايحرك أعصابْ
وبيها ع الدينار يركضــــلها شهرْ
ناس ماتلكة رغيف يســــــد رمق
وناس تطبخ من أجــــل كعدة بقرْ
ناس كاتلـــها البرد محرومة نوم
وناس عالتدفئة تغفى بلا ســــهرْ
الفقير تشـــــوفة نايم عالرصيف
كارتون فراشـــة والحافة شــجرْ
من كثر تعبة يذب روحة جتيل
وبحلاة الروح يصحى من الفجرْ
والغني بتكييف وفراشـــة وثير
على راحــــة بال نايم للظـــــــهرْ
الــفكر عالجـــــوع يحــــمد للأله
يكثـــّر التســـــــبيح ويدور أجرْ
خايف ومرعوب من يوم الحساب
لكن الشـــــــــبعان مامرة شــــكرْ
الغني لوباك مايســــــمع ســـؤال
ولوفقير يبـــــــــــوك معناها كفرْ
تلكة قانـــــــون المحاكم ع الفقير
بشـــــدة يتطبق عدل يكسر ظهرْ
لكن اليملك عقــــــارات ورصيد
يســــامحه القـانون ويغض النظرْ
لـــوحجة المســــــكين ماواحد اله
والغني يجذب واحـــــاديثة عبــرْ
حتى وكت المـــوت تتملقلة ناس
والفقيـــــــر بدفعة ينـزل ع القبرْ
والمصـــيبة لو خَطَر هدد وطنْ
الفقير يضحي يدفع بالخـــــــطرْ
لكن الشـــــــــــبعان تلكاه بالمطار
قبل كل الناس ينوي اعلى السـفرْ
ولوكلت ياناس ليش الحـالة هاي.؟
يكلك أســـــكت هذا من الله الـــقدرْ
احمد الله وعيش وارضى بهالنصيب
واصبر اعلى الضيم محمود الصّبَرْ
عمر يخلص ينكضي بكل الامــور
وابد لاتســــــــــأل ترة الدنيا ســفرْ
كلي معقــــولة القدر كال الله هيج.؟
وفضّل الارزاق نوع من البشــر.؟
شله بالعيشـــــة الفقير ابهالعذاب
وشنهو معناها الســـنين وهالعمرْ .؟
انجان من يولد قهر لمن يمـــوت
ياعساها اتحط حجر فوك الحجرْ
