فْلِيلَةْ البْهَا
تْبَاهَى فِيهَا البْدَرْ
عْلَى ظْهَرْ لَدْهَمْ 
مْگَنْدَرْ
حْكَا لِي بُويَا
عْلَى لْسَانْ بُوهْ 
حْكَايَة 
عْلَى اللِّي سَبْقُوهْ
كِيفْ كَانْ
النْسَرْ يْطِيرْ
فِالسْمَا
و كِي كَانْ يَحْضَنْ
عْلَى اللِّي لِيهْ
كَانْ يْعَلِّي 
وَ يْطِيرْ 
و عَمْرُو انْسَى 
تَرْبِيتْ بُوهْ 
يْحُومْ فِالعْلَا 
وْ لَا غَرُّو زْوَاقْ غِيرُو 
وَ لَّا غْدَرْ خُوهْ 
كَانْ حُرْ
وَ لَّا عَمْرُو 
غَرُّو بْهَاهْ
وَ لَّا زْرَعْ القْصَرْ 
فْيُومْ غْوَاهْ
كَانْ يَبْنِي بِالدْفَا 
عَشْ لْنَسْلُو 
يْصُونُو مَنْ القَرْ
و يَحْمِيهْ بِجْنَاحُو 
مِنْ الشَّرْ
و فْلِيلَة 
كَانَتْ مُوكَة القْصِيفَة 
و غْرَابْ لَكْحَلْ
بِالحْقَدْ عْلِيهْ
يَتْحَاكَاوْ 
فِخْصَالْ النْسَرْ
يَفْهَاوْ
رَامْهُمْ الحْسَدْ
وْ رَامُوهْ 
فْعَزْ الگَايْلَة 
وَ الحَرْ 
بْنَاوْ لِيهْ فَخْ 
مَنْ قَلَّة الحِيلَة 
وَ عْمَى البْصَرْ
عَمْلُو لُو 
مَنْ الرْضَى 
قْصِيدَة وْ غَنَّاوْهْ
عْلَاشْ المَرْضِي 
يَنْزَلْ 
عْلَى يَدْ بُوهْ
يْبُوسْ الكْتَفْ و كَفْ
و يَتْبَرَكْ بِيهْ 
وَ لَّا يْحَيِّي مْقَامُو 
و يَتْعَنَّى بِيهْ 
جَاهُمْ الجْوَابْ
مَنْ النْسَرْ
مَعْنَى
فْضَرْبَة تْفَتَّتْ الصْخَرْ
شْنُو السَّرْ
إِلَا كَانْ البُو حْنِينْ 
الوَلْدْ يَطْغَى 
وَ لَّا يَتْكَبَّرْ 
عْلَى الكْفُوفْ
اللِّي فْسَقْمُو 
مَرَّتْ عْلَى خَدْ وَ جْبِينْ
وَ دْعَاتْ لْلمُولَى 
وَ تْقَبْلَتْ بِالزَّرْبَة 
دَعْوَاتْ الصَّالْحِينْ 
شْنُو السَّرْ 
إِلَى كَانْ بُويَا
فِيَّ َحْنِينْ 
وَاشْ ذَلْ 
وَ لَّا شُوكَة 
مْگَرْجَة فِيَّ 
نْعِيشْ عُمْرِي بْحَالٍ 
مُوكَة كْحَلْ
مَسْخُوطٍ الوَالْدِينْ
لَا كَسْوَة لَا نْعَلْ
الرِّيشْ يَنْسَلْ 
وَ الجْنَانْ 
اللِّي مَنْ بْعِيدْ 
بْهَاهْ يَغْوِينِي 
وَقْتْ نْحُطْ عْلِيهْ 
وَرْدُو يَذْبَلْ 
و تَغْرَقْ رَجْلِي
مَنْ سَخْطْ بُويَا 
فِالوْحَلْ 
هَكْذَا رْبَايْتِي 
وَ حْرُوفْ المْسِيدْ 
رْوَاتْنِي 
عَمَّرْ شْفَارِي يْرَفْ 
وَ لَّا نْهَزْ عْلَى بُويَا 
يَدٍ وَ لَّا كْتَفْ 
هَذِي بَيْعَة 
مْسَگْمَة بِالرْضَى 
مَاشِي خُوفْ
وَ لَّا وَلْفْ 
هَذَا رْضَى 
مَاشِي عُرْفْ 
وَاخَّا ظَّلْ بْمَنْقَارَكْ 
تَحْفَرْ
عَمْرَكْ اطِّيرْ
كِالطِّيرْ 
إِلَى جْنَاحَكْ 
بِالسَّخْطْ مْكَتَّفْ ،،

فْلِيلَة البْهَا