**** صوتك**** من غير زعل
قالوا صوتك ملكك قولوا بحريه
فى ورقه حشروه جوه الصندوق
بصراحه صُعب تانى عليه
لما لقيته بين الورق مزنوق
قلت لا رجعوه تانى ليه
قالوا بقى ملك النايب 
اللى هايجيبلك كل الحقوق
******
يا نايب ديرتنا نورك هل علينا
لما شوفناك وسطنا ما صدقنا عنينا
دا العيد بيجينا مرتين فى السنه
وانت غالى بنشوفك كل كام سنه
لما بتهل بتملى القلوب فرح وهنا
********
قبل الصناديق ما تجينا
عربياتكم رايحه وجايه علينا
فى المناسبات رايحين جايين
مره تعزوا ومره مهنيييين
سلامات وبوس واحضان
كاننا اصحاب من زمان الزمان
*******
قبل الصناديق ما تمشى بحبه
بتمشوا قبلهم انتم بحبه
*******
طب والله فاكر مره زمان
روحنا لعضو ا فى البرلمان
وفضلنا نخبط ع الباب
ورجلينا ما خطت ال عتاب
ولا فتح بابه لينا
ولا من شباكه طل علينا
*************
الل يقول دا نايم جاى متاخر
واللى يقول 
دا سافر انت الل جيت متاخر
روحنا وجينا على مفيش
وقفانا يقمر عيش
*******
يا عضو ونايب دايرتنا
صوتى اعطيته لك امانه
بس ياريت ما يوم تنسانا
فى ناس بتبات جعانه
عشمانه
ف لقمه من غير اهانه
وهدمه تستر جلود عريانه
***********
امانه عليك يا اللى اخترناك
لما تروح تقعد فى البرلمان
ابقى افتكر وقفتنا معاك
ما نبقاش ماضى وف النسيان
*******
دول ناس حلمهم صغير
يعنى مش حاجه تحير
اللى عاوز يصرف لمراته علاج
واللى عاوز معاش عشان محتاج
ودى ارمله بتجرى على يتامه
مش حلمها جاه والا قيامه