مُولْ الحَكْمَة 
يْدَنْدَنْ بْرَاسُو 
هَزَّاهْ الثُخْمَة
يَتْرَنَّحْ بَكْتَافُو 
جَالْيَاهْ السَّرْبَة ،،

مُولْ القْلُمْ
وَ الكَلْمَة
كَانَتْ حْرُوفُو 
تْنَوَّرْ الظَّلْمَة
كَانْ كْلَامُو
يْعَلِّي و يْضَوِّي 
فِمْكَانْ النَّجْمَة ،،

كَانْ طْبِيبْ
يْشَافِي
و بِالقْوَافِي
يْعَمَّرْ الخْزَايْنْ
و المْطَافِي
كَانْ كْلَامُو
رْزِينْ و وَافِي
و نَبْعُو أصِيلْ 
صاَفِي ،،

مُولْ الحَكْمَة 
و القْلُمْ 
كَانْ يَسْرَحْ 
الذْيَابْ وَ الغْنَمْ
وَ يْهَشْ الوَحْشْ
بِالقْلُمْ
يْعَرِّي الظَّالَمْ
وَ يَفْلِيهْ مَنْ القْمَلْ ،،

كَانْ بُوهْ عَالَمْ
و قْرِيبْ الحَاكَمْ
عَمْرُو بَاعْ
وَ لَّا مْدَحْ الظَّالَمْ
وَ لَّا عَاشْ دْلِيلْ
كِيفْ الخَادَمْ
وَ لَّا حَلْمُو كَانْ 
فْيُومْ يَمْلَكْ لَبْحَايْرْ
وَ يَتَّسْرَحْ كِيفْ الغْنَمْ 
مَا حِيلْتُو لِلذْيَابْ
مَا حِيلْتُو لَبْنَادَمْ ،،

مُولْ الحَكْمَة 
بَاعْ لْسَانُو 
و كَسَّرْ لُوحْتُو 
و لوَايْحْ
عْلَى غَفْلَة غَيَّرْ جَلْدُو 
وَ لْبَسْ لَبْطَايَنْ 
جَرَّبْ السَّرْحَة 
و عَلْفْ البْهَايْمْ
فْرَحْ للحْصَادْ
و نْسَى بَرْدْ الجْرَايْحْ
سَمْرُو لُو 
مَنْ الطْمَعْ صْفَايَحْ 
و غَطَّاوْ رَاسُو 
بِالطَّرْحَة و طْرَايَحْ 
مُولْ الحَكْمَة 
عَاشْ عِيفَة 
بِينْ النَّاسْ مَاتٍ جِيفَة 
و غَطَّاتْ رِيحْتُو 
بالخْنَزْ گاعْ الرْوَايْحْ