" آه يا وطنْ "
***
باعوك يا وطن باگوا
ضحكتك گولي شلون
وجهك السمح بدلوا
صار الحزن إلك لون
باسمك يا وطن تاجروا
هذولا چذبْ يهتفونْ
***
ثوبك للمنيه فصلوا
لأرضك جابوا الطاعون
لحلگك الحيه لفوا
العضة تعلم سنون
عنك الهوى سدوا
النفس صاروا يشحذون
***
منك يا وطن تعجبوا
معگولة صبرك يكون
لناسك أشعجب يگتلوا
الغريبة أنت تگولي تهون
لأجل الكراسي گتلوا
أطفالك وفوگاهم يهتفون
***
عاش الوطن يموتوا
باأركانك وفوگاهم يصرحون
حريتك عنوان ادعوا
بچذب صاروا يصفگون
نار بأركانك علگوا
بچذب عاش الوطن يهتفون
***
أنت تدري يا وطن
مكرهم إلك بفنون
جلادك شما بدلوا
لابد تشوفه العيون
شما بدلوا وخفوا
هم ألك يكرهون
***
صبرك يا وطن وتهون
هم من خيرك يبوگون
اعرفك يا وطن وهما يعرفوا
إنك سمح وگلبك حنون
أعرفك جبل وما يگدروا
وأنت تسامح يا حنون
أشوفك شامخ ويعرفوا
لأهلك أنت العون
***
شعر
خالد عبد الجبار الفرج
