الشاعرة هناء نوار

المذكور أعلاه

صعبان عليا حالك
م الغلب اللى انت فيه
سهران و الفكر جالك
مانتش قادر عليه
و جبال ورق أدامك
عمّال تمرجح فيها
إشي إمضاءات و مراجعة
بتجيبها و توديها
و الصحة مش و لابد
و تقوللى عال العال
و ان كان لازم و لابد
توصفلي راحة البال
و منين حتيجى الراحة
و انت المذكور أعلاه
دماغك مش مرتاحة
مطحون كدة يا وِلداه
لا بتاكل و لا حتى بتشرب
و يادوبك كام فنجان قهوة
و تقولى انا لو نمت حتخرب
و الدنيا تبوظ كدة على سهوة
و كإن النوم دا ماهوش صاحب
و كإنك ع العدو متصاحب
و نسيت إنك أصلا إنسان
قدراتك فِ الكون محدودة
مهما هتكسب حتكون خسران
و ايام عمرك كدة معدودة
سيبها ع المولى اللى خالقها
قادر على فكرة يسويها
و إوعى تفكر يوم تسابقها
علشان بقة صعب تعديها
مانتش يوسف هذا العصر
و لا حتغير هذا الكون
إنت يادوب خدام فِ القصر
و اللى يعوزه الرب يكون !!