وانا بقول لكل الناس
كل سنه وانتم طيبين
لقيت مريم فهمى قدامى
ودموعها نازله ع الخدين
بتقولى ازاى تنسونى
قلت والله مانسيناكى
ولا الحزن ف قلوبنا
برد يوم على دماكى
ولحد النهارده الحزن لافف
والقلب بيبكى على ذكراكى
لكن احملك سلام لاخواتك
اللى سبقوكى ولا لسه هيجوكى
بوسيلى مريم فكري
وقوليلها لسه دمعى
عليها والله بيجري
وكمان مريم مكرم نظير
اللى مكانها ف قلبي
قصر يسكنه اميره ويا امير
وسالى مجدى زهران
اللى قلوبنا على فراقها
لحد اليوم والله قهران
واوعى تنسي اخواتك
بلال سالم طفل زيك
فى عمر الزهور
كان لسه بيلعب بكوره
او ف الشارع بيتشعبط ف حنطور
هناء يسري قبلك سبقتك
عند ربي هتلاقيها وتنول محبتك
فى الاخر عايز اطمنك
زى ماقولتيلي انا على دمى بأمنك
وحياة دم كل شهيد من اول
خالد سعيد وكريستى
والحسينى ابو ضيف وجيكا كمان
زى ما عزلنا عملاء الامريكان
ان كانوا حماعه او اخوان
مش هنام الا لما كل طفل
فيكى يا بلد يعيش فى امان

كل سنة وانتى طيبه يامريم
بقلمى / خالد بدوى