انا تاجر ....بابيع احاسيس
بابيعها فرط ...أو بالكيس
وتمنها يا ناس ببلاش
فاتح م السبت للخميس
كل اللي عايزه هتلاقيه
حب . كره . كله فيه
حتي لو عايز حسد
عندي كل اللي بتدور عليه
حتي موجود النفاق
اسمه التجاري مجامله
ايوه عندي كل حاجه
ايوه عندي لسته كامله
انت بس شاور وقول
وايدك زي ما تطول تتطول
ممكن تبقي الصبح سلفي
وبعد الضهر تكون فلول
وممكن تبقي من المعارضه
وهاتك يا ضحك مع مسئول
ليا فروع ف كل حته
ف سوريا ليبيا والعراق
ومحلي مشهور اوي
اسمه يبقي ارض النفاق

سيد صادق