وماتت مريم

____________

مريم كانت القلب الطيب

قلبها أبيض زى الفل

وش بشوش عمره ما يتعيب

وأجمل عين لما تطل

سحر عينيها كان ألوانها

كأن الكون يخلط ألوان

براءة الطفل بين أجفانها

وقلب مدخلهوش إنسان

فيه إله بتحبه تملى

وحب الناس به مليان

لما تضيق تقف وتصلى

قلب كان مليان إيمان

أنا معرفش ماتت إزاى

كان عسكرى ولا إرهاب

قالوا رصاص الغدر جاى

يملا قلوب كل الأحباب

وماتت مريم رغم صباها

كان الكفن علم أوطان

رغم إن الموت طواها

لكنه أرحم من الزمان