جيهان فتحي خنساء الاسكندرية‏

خــــيـــــــــــــال مـــــــــنك ::
~ْ~ْ~ْ~ْ~ْ~ْ~ْ~ْ~ْ~ْ~ْ~ْ~ْ~ْ

خيال منك ..
بيحييني ..
بيكفيني ..
ويسكن فيَّ يتغلغل ..
شعاع النور ..
يدوِّب ..
كل شئ فيّ ..
ويمحيني ..
وليه خايف وأنا ليلى ؟؟
ساكني هواك وبالثانية ..
أنا المكتوبة ليك عيني ..
وبفرشها ..
حرير أخضر ..
ياقلب الورد يا مزهر ..
يافارس عمري وسنيني ..
على رمشي ..
أنا جاية ومشيالك ..
هوى قلبي متحرمشي ..
تمد إديك تاخد كاسي ..
وكاسي .. نبع إحساسي ..
خلاص تاني مفيش أحزان ..
مفيش قلب يبات متهان ..
ف حب زي حب زمان ..
كما عنتر كما عبلة ..
قلوب نشبكها بالدبلة ..
بحور الشوق بترويني ..
ونسقيها .. لجناين ورد ..
فتطرح .. بيت لأحلامنا ..
مشاعر الحب تحويني ..
وأنفاسك تكون ليَّ ..
تكون فيَّ ..
ف تكويني ..
تكون الدولة ما بينا ..
أكون شارياك ..
وتبقى العمر شاريني ..
أكون دستور ..
لكل الناس أكيد محظور ..
وليك إنت أنا بهدبك ..
حدود نفسي ..
وإنت النفس تهديني ..
~ْ~ْ~ْ~ْ~ْ~ْْ~ْ~ْ~ْ~ْ~ْ~ْ~ْ~ْ~ْ