حكايتى مع مُهجه

_______________

مُهجة دى قصتى ومحبوبه متولى

للعمر دايم هوى فـ غزلّها بـ يصّلى

و عِشّْق متولى .. عِشّْق فلاحى

م الفجر يكتب لها رغم إن ليله صاحى

يوصف بـ دار و عنب و جبنه و سمنه

حتى براد الشاى من يدهّا فتنه

فدادين حب طارح على بساتين رمان

ومعاها شوق صابح من حبيب ولهان

بالذمة دى أوصاف تناسب الرقة

دى ملكه ليه تتشاف .. فاكهه بتتنقى ؟!

لو تعرفى ياملِكه الحب إيه حقـــا

آه من عشقك .. وألف آه يا مهجه

أتمنى أوصل قلبك بقلب رقيق اللهجه

بتمنى أحكيلك و أوصف فى أسرارك

تستاهلى بالدهب أشغِل ف أوصافك

وأنا فى العشق م البندر

بشوف الماس فى ضى السُّكر

وإشوف فى العين بحر له جفنين

بس ماله قرار مَعّرف واخدنى لفين

القصد أغازل مهجه وأغزل لها حكاية

توصف جمال القمر على خد موهجاية

فى حبها مراكب الهوى رايحه وجايه

صادنى الشوق لها من قلب الـ ميه

يا مهجه يا سلطانه على بنات حوا

يا ضى نن العين ف القلب من جوه

يا جمال وربانى بعشق ربانى

خلانى أتوب عن كل خِلانى

بنيت لك سبع قصور وبرج ستين دور

وبحر بشطين مخصوص لحبيبن

وقمر مبينامشى رهن الإشارة يمشى

وألف وردة حمرا وألف كل لون

تهمس لشفايفك عن حبى المجنون

كل الزهور فى حبك تدبل قصاد رمشك

وافردها فـ كل طريق تمشى فيه رجلك

والنور بيضحك لِك فى قلب أغنيه

وقوس قزح مخصوص على شلال مَيَّه

وعيشه ولا الأحلام لو تطلبى ببساطه

أزرع لك الضجكات وطرحها شكولاته

وعد يامهجة ليكى بدنيا غير الدنيا

فيها الزمن بيقف ساعه فـ الثانيه

يقدم التحية ويبوس على كفك

ياهل ترى وفّيت بعض من حقك ؟

يا مُهجه المُهجات

حبى مايتوصف ولا زى الحكايات

غير إنه حتماً ولابد

يليق بست الكل وأجمل الأميرات

رباعيات مريومه