‏حاتم يوسف‏
رساله من ام لابنها الشهيد
( موقف حصل ف ميكروباص الموقف الجديد ف اسكندرية النهاردة الصبح )

- انا : ما تشد شوية يا اسطى

- الاسطى : يعنى هطير يعنى يا بيه .. ما السكة واقفة قدامك اهى

- الست : والنبى يا ابنى متنساش تنزلنى قدام عربيات شمال سيناء عشان بتلخبط كل مرة

- الاسطى : حاضر يا ست .. قولتلك قبل كده حاضر

- انا : انتى رايحة سيناء يا امى ؟

- الست : ايوه رايحة ازور محمد ابنى .. اصله ف الجيش

- ابنك مجند ؟

- ايوه امال كنت عايزنى اقعده جنبى .. القعدة للبنات .. اول ماجه ميعاد تجنيده راح ع طول .. ما هو اصله طالع لسيده الله يرحمه .. برضه كان ف الجيش .. كان نضورجى .. روخر إيه مات عنده كتير .. 90 سنة إنما عينه تجيب لحد البر دكهه .. محمد ابنى برضه نشنجى اوى .. بيتمرن ع الفنتوم والله

- ربنا يوفقه ويرجعه بالسلامة

- والنبى انت باين عليك طيب وابن حلال زيه .. ده حتى شبهك كده والنبى وطولك تمام .. انتو شكل بعض كده ليه ؟ .. انت عمال تكتب ايه ؟ .. هه بص لى هنا انت سرحت ف ايه ؟

- ( تاركا ما بيدى ) ابدا والله معاكى اهو يا امى

- هيقولى ابدا برضه .. ما هو محمد كده برضه .. يبقى فيه اللى فيه واساله يقول لى ابدا .. هى ابدا دى اللى بتخلينى اعرف ان فيه حاجة (تبتسم )

- ( ابتسم ) قلب الام بقى

- ايوه امال .. ان ماكناش احنا نحس بيكم مين هيحس .. بس هقولك ع حاجة

- قولى يا امى

- سيبها ع الله هو قادر يسلم من كل شىء رضى

- ونعم بالله

- بقولك ايه .. ما تكتب لى جواب لمحمد بدل ما انت عمال تشخبط كده

- الله ! انتى مش رايحاله يا امى ؟!

- لأ ما هو ربنا افتكره ف رمضان اللى قبل اللى عدى

- ( مصدوما ) مات ؟!!

- لأ استشهد

- هو كان من اللى كانوا وقت الفطار هناك ف الـ ..... و .......... ( تتلعثم كلماتى ) ربنا يرحمه

- انا بقى اتعودت كل شهر اروح ازور زملاته هناك .. اوديلهم زيارة معتبرة .. اومال ما هما ومحمد واحد .. كلكم واحد يا ابنى وايامكم صعبة ربنا يعينكم عليها

( من قبل اللحظة دى بجملتين وانا فعلا مفصول ومش لاقى كلام اقوله )

- ها قولت ايه ؟

- ف ايه يا امى ؟

- هتكتب لى جواب لمحمد ؟

- ( بدون تفكير مسكت القلم والنوت وفتحت صفحة جديدة ) طبعا .. اكتب ايه ؟

- اكتب من فوق كده بسم الله الرحمن الرحيم .. وبعدين بوسة من هنا وبوسة من هنا وقوله امك بتسلم عليك .. صحتها بقت عال العال .. رجلها خفت وهتروح مصر تدعيلك ف ام هاشم .. وقوله انا زعلت مع نبوية اوعى تكلمها يا محمد .. تصور يا محمد بتقول لى انتى مركبة ف رجليكى بابور .. عايزة تكسحنى يا محمد عايزة تكسح امك .. اوعى تكون مش بتكتب وبتضحك عليا ؟

- بكتب والله اهو يا امى .. كملى

- بص يمين وشمال يا محمد وفتح عينيك واوعى عينك تغفل حاكم دول غدارين .. وكُل كويس عشان تصلب طولك .. الواحد ان ماملاش بطنه ميعرفش يعمل حاجة .. والبنت زكية بنت خالك الباكسة ( مش فاهم معناها ) قلقانة عليك .. مرات عمك قاعدة مع ابنها ف مصر عقبال املتك بقى وتتجوز واحدة من مصر بندرية .. لف نفسك كويس بالبطانية الدنيا بتسقع .. انا عارفاك مابتطيقش الغطا تزقه برجليك توقعه م ع السرير احسن تاخد رطوبة ومناخيرك تفضل سايبة وتقعد طول النهار تشن .. طول النهار بدعيلك ربنا ينصرك ع العدوين والسلام ختام يا بنى

- ( انتهيت م الكتابة وقطعت الورقة م النوت وناولتهالها ) اتفضلى يا امى

- ( ترد يدى وتبتسم ) لأ خليها معاك انت يا ابنى........