خليكى فاكرة ياسمره
حاجبك المرفوع وقع
وشعرك الإسود الممشوط
مبقاش بيرقص م الدلع
غرقان بظلم ولادك اللى نكراهم
واحمر شفايفك المحطوط
شقق ملامحك م الوجع
مخلوط بدم ولادك هدومك
وبتلومى ليه لونك فجع

خليكى فاكرة ياسمره
هدمتك مكانتش عار
بس قلبك شال همومك
خلاكى كلك من رُقع
تتقطع وتتخيط وتتهان وتتباع
فتحالى صدرك منتجع
وعورتك مكشوفة قدام كل دار
ولساكى بتصلى وبتبكى مرار
لساكى مخدوعة وعاوزانى اتخدع

أكلانى فى ليلى
وشاربانى ف نهارى
لساكى نكرانى ،وعاوزانى الجدع
فى الشر زرعانى وببكره واعدانى
من إمتى خيرك كان طلع
من إمتى يومك كان رجع

سيباهم يخونوا فى أمانتك
ولا عمر صوتك إنسمع
أنا عمرى ماشككت فى ديانتك
ودبحتى طفل عشان ركع

خليكى فاكرة ياسمره
عمر الدمع ماكان ف عيونك
غيرة مطرة بتصب ف طمع
خليكى فاكرة ياسمرة

طمعك مش هيحلى الحنة
ويعلى هرمك من قرع
طمعك بيودينى ف جنة
بتجيبلى حالة من الصرع