#نشأت
هو انا اشتكيتلك
لما عايزه تحرميني من نار هواكي
وﻻ شفتي في عيني دمعه
تشتكي لوعه اساكي
ماتسيبيني اعيش في نار
ماتسيبيني ادوق مرار
ده الحب احلي في لوعته
وكاس العذاب..فيه رقته

#مريومه
لا مشتكتش من هوايا
ولا قولت لأ لمحبتى
بس ايه أصل الحكايه
لو بعدت عن سكتى ؟

#نشأت
ابعدي..وسيبيني افكر
امتي اشوفك مره تانيه
صدقيني..والله حقدر
اعيش معاكي في كل ثانيه

#مريومه
لما هبعد هبعت خيالى
يزور منامك كل ليله
تبقى الأحلام أمالى
فيها نعيش لحظه جميله

#نشأت
عراف..والودع قال لي.. حتحب من تاني
واسهر..وينشغل فكري..وقلبي حيعاني

#مريومه
عراف وأنا قابلته
يوصف لى فى غرامى
من طيبتى صدقته
وعشت بأوهامى

#نشأت
بقول
طب علي ايه
واشغل حياتي ليه
قال لي الودع..مكتوب
ومافيش فيها هروب
حتشوفه حتشوفه
ماانت ياسيدي مطلوب

#مريومه
مطلوب أصدق العراف
عن حب لسه ما شفته
بالحق قلبى منه خاف
من كل خاين صادفته

#نشأت
انا قلت..اقرا الكف
وافتح في فنجاني
قعد يدور ويلف
وقال لي انا الجاني

#مريومه
جانى الحبيب فجأه
كما وصفه العراف
وكأن الهوى صَدقه
أو فيلم كان متشاف

#نشأت
طيب ياعرافه
اقريلي الكف..اقري الفنجان
من غير ولا لف..من غير دوران

#مريومه
فنجانك آه من فنجانك
مكتوب فيه ألف فراق
وكأن الغدر ده علشانك
من كل جموع العشاق

#نشأت
طيب
احكي عن قلبي ومواويله
وامتي اللي في بالي راح اطوله
مايهمش عمري او طوله
انا عاوز اعرف..ليه حيران

#مريومه
سألت حروف الفنجان
ليه دايما فى هواك حيران ؟
قالى بيدوب من همسه
وحدانى وقصده الأمان

#نشأت
ايوه ﻻزم نفترق
رغم انك جوه قلبي
وفي ضميري انت حبي
اﻻ انك وانت جنبي
كل عمري بيتسرق
يبقي ﻻزم نفترق

#مريومه
ونفترق..
من بين ايدين المعشوقين
ونفترق ...
كأنه ذنب على الخطاه
ونفترق ..
مكتوب نعيش محرومين
ونفترق ..
ما هى دى أصل الحياة

#نشأت
بقي كده
وبكل بساطه
بتقولي الماضي مات
ومابقاش فيه حاجه بنا
غير حبه ذكريات ..!!