{{ انـا ليّــة ســؤال }}

كلمات الشاعر \ عـادل عوض سند

انا ليّه ســؤال

. أزاى عديت ؟؟

ودخلت القلب عملته البيت

مع انى قافل بالترابيس

على حتة روح وجبال احاسيس

على ارضه البور

وفتحت هويس

والنبض اهو عاد .

دا اكيد .. حبيت .

. يا ابو جفن شباك

والرمش سهام

وف حضن الننى

الشوق بينام

انا شفت البحر

مابين شطين

والموج يتدلع

بين جفنين

راح ننزل

واعرف آخرى انا فين ؟؟

وحا نغرق رغم ان أنا عوام ..

يا ابو روح بترش الدنيا .. عبير

وكإنّك بتطيّر عصافيـــــــــر

مش لاقى قاموس فيه كلام يتقال

عن ضحكه تقوّم ميت زلزال

والشفه عشانها ملوك ..

تتشال لو راح نلمسها العقل ..

يطير

.. ..................... 26 / 3 / 2013