جارى التحميل
استخدم زر ESC أو رجوع للعودة
لو تعرفوا يا ولادي
انا كنت ايه زمان
لتنزل دموعكم رمادي
علي اجمل بستان
اد ايه انا كنت هادي
وناجح كمان
كنت احب الشعر والمغني
حلو الكلام وله معني
واحب الهدوء وصوت الكمان
وكان بيتي جميل
بالورود والعطور مليان
وقلب كان فاضي
بلون فصوص الرمان
لو تعرفوا يا ولادي
لو تعرفوا قولولي
اصل انا نسيت ال كان
ومانيش فاكر
اني كنت ف يوم انسان
متشكرين يا اخواتي
السبب واضح وبان
بس ياريت تقولوا لولادي
انا كنت ايه زمان
واكيد انا عارف
ان فات الاوان
وكمان انا عارف
اني بقيت دخان
متشكرين يا اخواتي
انا ال بقيت غلطان
لا عاد لي بيت
ولا صاحب
ولا حتي جيران
ولا حد فيكم بيزورني
زعلانين عليا
وانا كمان زعلان
بس امانة عليكوا المرة دي
لما اموت
تتدفنوني جمب اختي واخويا
ال ماتوا شبان
وتكتبوا علي قبري البعيد
ملك الاحزان
وقولوا لولادي ميحزنوش
لأنه مات غلبان
المصدر: الشاعر/ علاء الجمالى... نشر بواسطة/ علاء زايد
