ماذا أقول له ؟ .. لمّا يقابلني
ازاى أعبر وأبوح له باللي شاغلني
خايف أقوله بحبك .. أحسن يبهدلني
وازاى مااقولوش .. والشوق مشعللنى
خلاص بقيت مرووش .. وإيه اللي يعدلني
***********************
حاولت أفكر بعقلي .. لقيته راخر خف
.. لما بلمح خياله .. عيني وراه بتلف
ولما يقف في حته .. قلبي يقوللى قف
بشوفه في الأحلام .. في اليقظة والمنام
.. دا لو باعرف أنام .. (من العياط والنف)
***********************
الواد أبو سويلم كان حب زيي كدا
قالوله روح قولها .. شمتت فيه العدا
واتسف حتة قلم ، واتقال له عيب كدا
البت كات جامدة ،اكمنها بت عمده
أدى آخرة اللي قلبه ينده ، يلبى الندا
**********************
قطيعه الحب وسنينه .. ياعينى ع اللي عايشينه
وشابطين فيه وعايزينه .. بيبقى عقلهم فينه
خصوصاً من طرف واحد ، تلاقى الكل بيدينه
بيتعذب ولا ينولشى .. يقولوا ( حب ولا طالشى)
فايتنيل مايزعلشى .. من اللي يشوفه ويشينه
