من أمّ لولدِها العاق---بقلم د/صبرىإسماعيل

إبنى الغالى
وضنايا فى رحلة أيّامى
يا كل حروف الهمس بصوتى وكلامى
والضِحكة الصافية الأولى
ومعانى البهجة وإلهامى
بافتكرك وانت بتحبى أوّل خطاويك فى الدنيا
وانت بحضنى وأنسامى
وانت بتعبر يمّ النور بقصصى وأحلامى
وانت بتهتف حرف الميم
وتركّب بالحانك كلمة ماما
وانا باحلم بك مرفوع الهامة
تسجد بسجودى تركع بركوعى
تتعلم بكفاحى كرامة
بافتكرك وانت بتبنى جذور المجد
بإيدك وكتابك
وبدعوة أمّك على بابك
تسهر تتألم ل نواحك
وكبِرت وكِبرت أحلامك
وفى وسط التوهة نسيت إنّى
وب جرى العُمر يزيد همّى
تبعد عنى!
وآهات الدنيا زادت سِنّى
وانا فاكرة ان فى حِلمك حِلمى
ولقيت الوهن الجوّانى
والحزن الآسى بيكسرنى
بانده ولا باسمع صوتك
فى ربيع العُمر يطمّنّى
وكأِنّك هارب من شوفتى
ومهاجر ياحمام البِنّى
كان نفسى تكون اللى رويته
وبعرقى وعمرى استنيته
ترحم عبراتى اللّى بتصرخ
وتدوب فى الحِلم اللّى بنيته
والاقيك بالقرب أمّا انده لك
وأكون فى أجندة أيامك
وأكون من جِملة رسمالك
أتألّم ألاقيك ضلالية
لمّا انده ألاقيك جوّايا
ولا اعانى من غربة نفسى
وصراعى يضاعف من يأسى
ودموعى تزوّد من همسى
وبرغم الصدّ الساكن جوّاك
وبرغم الهجر فى ظُلمك وجفاك
بادعيلك ودعايا بقلبى
ولا تبقى الكفّارة لذنبى
يغفر لك ويعينك ربّى
يغفر لك ويعينك ربّى