جارى التحميل
استخدم زر ESC أو رجوع للعودة
طِنّ الرُزّ هايبَّا بكام ؟؟
رُدّ علَيَّا يا عَمّ حسام
عَمّ حسام بَصّ وقام قايل
حِسَّك عينَك ياد يا سخام
تِفْتَح بُقَّك بالكِلْمادِىِ
وتِسْأل تانِى عن الأسْعار
حتَّى انْ باعوا الكيلو الرُزّ
ب عشرَه جنيه .. الشَعْب اخْتار
رَيِّس عارِف فين مَصلحتُه
انْ شالله يوَلَّع فيه بالنار
بَرْدَك حابِب يمْشِىِ وَراه
حتَّى انْ طال بِيِه المِشْوار
رَدّ سخام (اللِّىِ ما يتْسَمَّىََ)
وقال خَلِّينا وَرَا الكَذَّاب ؟؟
عَمّ حسام قام مادِد إيدُه
ولاطشُه ب كَفُّه وقال : يا حمار
لَمَّا كبارنا يقولوا الكِلْمَه
علينا نقول حاضِر وخَلاص
سِلْو بَلدنا بَقالنا سنين
ما نحَقَّقشِ مع الحاكمين
هُمَّا يسُوقوا وكلّ الشَعْب
يقول ع الزِفْت بتاعهُم زِيِن
وايَّاك عاوِز تانِىِ تجَدِّد
فِكْر المَخابيل الثايرين
دُوُل خِرِبوها ولولا الرَيِّس
كُنَّا نافِسنا اليَمَنيِّين
ولَّلا نافِسنا السوريِّين
ولَّلا نافِسنا اللِّيبيِّين
ولَّلا بقينا عراق التانيَه
اتْلِهِىِ خَلِّينا يا واد عايشين
وامَّا اسْعار الرُزّ توَلَّع
قول الشَعْب المَصْرى طخين
لازْمَه يخِفّ ف وَزْنُه شوَيَّه
ومِحْتاج يعْمِل حَبَّه رِيِجيم
kenanaonline.comإعجاب ·
تعليق ·
مشاركة
