(فلاح وأفتخر)... الشاعر /مبروك علوه

(فلاح وأفتخر)☆
أنا فلاح وافتخر والطبع أصيل
فى طلوع الشمس أحب أنشد وأقول مواويل
أروى عطشى كل صباح بماء النيل
وفى البستان أغازل الورد والياسمين
بين الغيطان مع فاسى بقضى أنا يومى
أشقى واتعب فى أرضى وصابر على همومى
لا بجيب فى سيرة فلان ولا زعلان من علان
الطيبه فى طبعى مزروعه والادب فيا من زمان
أصلى الضهر وأقعد أفرد فرشتى
رغيف عيش مع جبنه قديمه وأكل لقمتى
مانا باصبر على كل شىء وراضى بقسمتى
وكوباية شاى على الراكيه تخلى دماغى تبقى تمام
وفى ضل اقرب شجره أتمدد اخد راحتى وانام
بأريح نفسى من التعب وأبعد عن الزحام
الهوا يهفهف عليا وأغرق فى أجمل أحلام
واخر اليوم اقوم البس جلابيتى
واخد معايا من خير ارضى وعلى بيتى
ألأقى مراتى طبخه على العشا بط وحمام
مع طبق شوربه سخن ورز من البرام
أكل واصلي العشا وعلى فرشتى أنام
مرتاح البال وسعيد وأبات مع الأحلام
وكل يوم على الحال ده مبسوط وعشتى تمام
ما أحلأها عيشة الفلاح واسمع تعظيم سلام
☆☆☆☆☆☆☆☆☆☆☆☆☆☆؛

مبروك علوه