((يـــاامـــة ))... بقلم الشاعر /ممدوح حنفي

((يـــاامـــة ))

بقلمى : ممدوح حنفى

ياامه تحيه وبوسه لخدك

ياااامة .. قتلنى بعدك
منين ابتدى ..
وفين انتهى ..
والزمان معاند مهجتى 
والحنان قاسى فى غربتى 
يادوب انا والرغيف 
وقلمى ودفترى والخريف
أكلم الاثير اقول له .. 
قول لها .. انا بخير 
اوشوش الطير 
ماتنساش تقول لها
انا بخير .. يا امه انا بخير 
لسه عينيه بتشوف
والسما قمرها مكسوف
وقلبى بالشوق ملهوف
عديت الخمسين
ولحجرك ملهوف
ياااامه انا بخير
وياترى انتى بخير
وابويا يا امه .. وجدتى
نورتى الجنه يا امه
نورتى كل الاحباب يا امه
اتكلمى ردى عليه
دى الدموع ملت عينيه
يا امه اخبارك فين .. انا حزين
يا امه احضانك فين .. دا انا حزين
بتمر الأيام .. وانا خايف عليل 
وليلى طويل .. وصبرى قليل
ياااااامه .. ياااااامه .... 
كلمه وكلام .. عايز اقولهم
وحلم واحلام .. يسعدنى انولهم 
كلام وكلام يا امه ..
والحقيقه احلام يا امه ..
عايز انام يا امه ..
انام .. لــ ميت سنه قدام
انسى الاحزان
ابعد عن الاوهام
يا امه فى حضنك انام
فى حنانك انام
فى امانك انام
بين رموشك انام
ادوب فى صبرك وانام
انتى فين يا امه ؟!!!
تعاليلى قوام
وانا فين يا امه ؟!!!
ارحمينى م الايام
امتى تجينى يا امه ؟
مستنى تطمنينى يا امه !!!
مستنى نسيم ورقه وردك
يا امه تحيه وبوسه لخدك
تعالى بقى قتلنى بعدك
مش عارف ابتديت ولا لسه !!!
ولا عارف انتهيت ولا لسه !!!
ياااااامه .. . ..