ابكي ياعيني واملي البحور بدمعي ودمي
ضهري إنقطم وانطفي نوري وانفطر قلبي
ليه ياموت تاخده مني وهو حته مني
وليه ياغدر تحرق قلبي علي ضنايا 
وليه يادنيا تحرميني من فرحتي وهنايا
بوح ياقلبي ونادي بأعلي صوت
غدروا بضنايا وكانت آخرة شهامته موت
وآاه ياحسرة قلبي عليك ياإبني
ياأغلي مني ومن العين والنني
غربتك گانت صعبه..ليه يهون عليك تسيبني 
وآااااه ياوجع العمر والسنين
ومن بعدك ياحبيبي هروح فين
وآااه ياندمي ياابني من بعدك هعيش لمين
نفسي اعرف غدروا بيك ليه وگان ذنبك ايه
وايه ياضنايا اللي عملته عشان تموت عليه
كبرتك وراعيتك يافرحة عمري وبقيت دكتور 
وانا وحبايبك ياما اتباهينا بيك بهو الزهور
وبطعنة خاين جبان يجري دمك هناك بحور
وبقت حياتي من بعدك ياقلبي أرض بور
ومن كُتر البكا ياضنايا عميت وانتهيت
زرعت فيك الرجوله وعمرك مايوم قسيت
وغدر بيك خاين معدوم النخوه والشهامه
طعنك يازينة الشباب ياللي كنت قدوه وعلامه
وراحت حياتك علي إيد جبان ياميت ندامه
وادي النتيجه ياضي عيني روحك هترتاح 
وهتسيبني وحدي انا وألمي أعاني الجراح
صعب عليا نعشك يبقي قدامي وانا لسه عايشه 
صبرني ياربي وارحم قلب بينزف وعين باكيه
والندامه ع الجبان ومعدوم الأصل كمان
غدر بضيف بلاده وللعروبه ماصان وخان
قولت لأه طعنك.وخلاك غرقان في دمك
ياريت ياابني بروحي فديتك وفديت عمرك
بس حقك مش هسيبه..واللي خانك يوم هجيبه
ومهما طال بيا الزمان ماراح يعيش الغدار يوم في أمان
وهفضل عمري ابكي ومن غدر البشر لربي هاشكي