هتسيب 
لو تفضل ماشيه بالمحاسيب
تفضل فى ديل الأمم وتخيب 
هتسيب
لو بالقرايب والحبايب 
والغلبان ملهش نايب
ونقول عليها قسم ونصيب
هتسيب 
مش بالشهاده وتبقى عاده 
كل اللى حاسس بالبلاده
يشوفلو عم وللا نسيب 
هتسيب
فتح ودانك مش أوانك 
إبن الباشا ياخد مكانك
مهما تكون شاطر ونجيب 
هتسيب
ولو مفيش يبقى البقشيش
ترمى الزهر يجيبلك شيش
لحد فاتح درج وجيب 
هتسيب
وبالكروت تسلك وتفوت 
ممعاكش تاخد بالنبوت
خبطتين فى الراس هتصيب
هتسيب
الكل شايف بس خايف
شغل الأونطه فى الوظايف
والألاعيب ويا التهليب
هتسيب